உற்சாக பானம் படுத்தும் பாடு..!

by **அ.இராமநாதன்** Sun May 31, 2020 5:35 pm

சென்னையில், 'டாஸ்மாக்' கடைகள் இல்லாததால்,
பக்கத்து மாவட்டமான, காஞ்சிபுரத்திற்கு, தம் காரில் பலரும்
செல்கின்றனர். இதற்காக காரில், 'அவசரம், கொரோனா
பரிசோதனை' என்ற, 'ஸ்டிக்கர்'களையும் மற்றும் டாக்டர்,
வக்கீல், 'ஸ்டிக்கர்'களையும் ஒட்டிச் செல்கின்றனர்.

போலீஸ் பரிசோதனையிலிருந்து தப்பிக்க, சிலர், போலீஸ்
நண்பர்களையும் உடன் அழைத்துச் செல்கின்றனர்.

இதற்கெல்லாம் உச்சகட்டமாக, 'பிரஸ்' - ஊடகம்,
'ஸ்டிக்கர்'களையும் ஒட்டிச் செல்கின்றனர்.

போலீசார் சளைத்தவர்களா... இதுபோன்ற வாகனங்கள்,
'சரக்கு'களுடன் திரும்ப வரும்போது, அவற்றை நிறுத்தி,
அந்தந்த வாசக, 'ஸ்டிக்கரு'க்கான, 'ஐடென்டிபிகேஷன் கார்டு'
கேட்கின்றனர்.

போலிகளால் அவற்றை காட்ட முடியாதே - இருந்தால் தானே!

உடனே, வாகனப் பரிசோதனை நடக்கிறது; மாட்டிக்
கொள்கின்றனர். அவர்கள் மீது உரிய நடவடிக்கைகளை
மேற்கொள்கின்றனர், போலீசார்.

போலீஸ் நண்பர்களுடன் வருவோர், பெரும்பாலும் தப்பி,
சரக்குகளுடன், சென்னை அடைந்து விடுகின்றனர்.

மற்ற சிலரோ, காக்கிச் சட்டைகளுக்கு, 'காந்தி'யைக் கொடுத்து,
தப்பிக் கொள்கின்றனர், சரக்குகளுடன்!

இது ஒருபுறம் இருக்க, நண்பர் ஒருவரை சந்தித்தேன்.
விவகாரம், சரக்கு பக்கம் திரும்பியது.

அவர், பச்சைத் தண்ணீர் மட்டும் தான் குடிப்பார்; உ.பா.,
பழக்கம் கிடையாது. ஆனால், ஒரு ஆண்டுக்கு முன் நடந்த,
தன் தங்கையின் திருமண வரவேற்புக்கு வந்திருந்த
விருந்தினர்களுக்கு, 'டின்னருக்கு' முன் உற்சாக பான
விருந்தளித்தார்.

இதற்காக, வெளிநாட்டு, உ.பா., பாட்டில்களை நிறைய வாங்கி
வந்திருந்தார். ஆனால், விருந்தினர் அனைவரும், தம்
மனைவியருடன் வந்திருந்ததால், அன்றைய விருந்தில், கால்
பாகம் கூட காலியாகவில்லை.

மீதி அனைத்தையும் தம் வீட்டிற்கு எடுத்துச் சென்று விட்டார்.
அவர் தான், உ.பா., பிரியர் இல்லையே; அதனால், அவர் வீட்டில்,
'ஸ்டாக்' இருக்கும் என நினைத்து, போன் செய்யாதவர்களே
இல்லையாம்.

'அதை ஏம்பா கேட்கிறே... முதன் முதலில் போன் செய்தது,
என் ஆடிட்டர் தான். இரண்டாவதாக போன் செய்தது, நான்
வைத்தியம் பார்க்கும், சென்னையில், மிகப்பெரிய தனியார்
ஆஸ்பத்திரி டாக்டரின் உதவியாளர்!

'இது போதாதென்று, என் அத்தையின் மகன்கள், போன்
செய்தனர். நச்சரிப்பு தாங்கவில்லை... திருமண வரவேற்பு
முடிந்த கையோடு, மீதமிருந்த பாட்டில்களை எல்லாம்
நண்பர்களுக்கு கொடுத்து விட்டேன் என்பது தெரியாமல்,
என்னிடமே இருப்பது போல் நம்பி, போன் செய்து, கொத்தி
எடுத்து விட்டனர்...' என, புலம்பினார்.

'கவலையை விடுங்கள்...' என, ஆறுதல் கூறிய எனக்கு,
அதி புத்திசாலியான, லென்ஸ் மாமா நினைவில் வந்தார்.
அவர் தான் அதி புத்திசாலி ஆயிற்றே! 'டாஸ்மாக்' திறப்பதற்கு
காலங்கள் ஆகும் என்பதை முன்பே கணித்து, 'ஸ்டாக்' வாங்கி
வைத்து விட்டார்!
-
--------------------------
அந்துமணி பா.கே.ப.,

வாரமலர்

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

உற்சாக பானம் படுத்தும் பாடு..!

உற்சாக பானம் படுத்தும் பாடு..!