இலங்கை அரசியலில் ஓரம் கட்டப்படவில்லை என்று விடுதலைப் புலிகளின் முன்னாள் தளபதி கருணா அம்மான் கூறியுள்ளார்.

‌விடுதலை‌ப் புலிகள் அமைப்பின் சர்வதேச தலைவர் கே.பத்மநாதனின் வருகையால், கருணா அம்மான் அரசியலில் பின்னுக்குத் தள்ளப்பட்டிருப்பதாக செய்திகள் வெளியாகி உள்ளன. இதனை கருணா அம்மான் மறுத்துள்ளார்.

ஆளும் ஸ்ரீலங்கா சுதந்திர கட்சியின் துணைத் தலைவராகவும், மறுகுடியேற்றத் துறை துணை அமைச்சராகவும் உள்ள அவர், "சண்டே அப்சர்வர்'' நாளிதழுக்கு அளித்துள்ள பேட்டியில், போரினால் பாதிக்கப்பட்டுள்ள வடக்குப் பிராந்தியத்தின் புனரமைப்பு பணிகளுக்காக சர்வதேச தமிழர்களிடமிருந்து நிதி திரட்ட பத்மநாதன் உதவி செய்து வருகிறார். இது அரசின் கொள்கை முடிவு. அவரின் வருகையால் அரசியலில் நான் ஓரங்கட்டப்பட்டு வருவதாக கூறுவது தவறு.

அவர் வடக்கு பகுதியைச் சேர்ந்தவர். நான் கிழக்குப் பகுதியைச் சேர்ந்தவன். நாங்கள் இருவரும் வெவ்வேறு பாதைகளில் சென்று கொண்டிருக்கிறோம். அவரால் எனது அரசியல் வாழ்வில் எந்த பாதிப்பும் ஏற்படவில்லை. நான் மக்களால் தேர்ந்தெடுக்கப்பட்ட பிரதிநிதி. மக்களிடையே எனக்கு மிகுந்த செல்வாக்கு உள்ளது.

அதிக பாதுகாப்புமிக்க பகுதிகளாக கருதப்படும் இடங்களில் தமிழர்களை படிப்படியாக குடியேற்ற அரசு திட்டமிட்டுள்ளது. இப் பகுதிகளைச் சேர்ந்த 68,000 குடும்பங்கள் இப்போது வேறு பகுதிகளில் வசித்து வருகின்றனர். அவர்களின் நிலங்களை படிப்படியாக அவர்களிடம் திரும்ப வழங்க நடவடிக்கை மேற்கொள்ளப்பட்டு வருகிறது. சில குடும்பங்களை வேறு பகுதிகளில் நிரந்தரமாக குடியேற்றவும் முடிவு செய்துள்ளோம்.

வடக்குப் பிராந்தியத்தில் நிவாரண முகாம்களில் வசிப்போர் இந்த ஆண்டு இறுதிக்குள் தங்கள் சொந்த இடங்களில் குடியமர்த்தப்படுவார்கள். இப்போதைய நிலவரப்படி முகாம்களில் 28,000 குடும்பங்கள் உள்ளன. வாரத்துக்கு 2000 குடும்பங்கள் என்ற அடிப்படையில் முகாம்களில் வசிக்கும் குடும்பங்கள் குடியமர்த்தப்பட்டு வருகின்றன. எனவே விரைவில் அனைத்து குடும்பங்களும் சொந்த இடங்களில் குடியமர்த்தப்படுவார்கள்.

முகாம்களில் வசிக்கும் தமிழர்கள் அனைவரும் சொந்த இடங்களில் குடியேறிய பின்னர் தன்னார்வ தொண்டு நிறுவனங்களின் உதவியுடன் அவர்களுக்கு அடிப்படை வசதிகள் செய்து கொடுக்கப்படும். இவை அனைத்தையும் உடனடியாக நிறைவேற்ற முடியாது. அதற்கு காலஅவகாசம் தேவைப்படும்.

இந்திய அரசின் நிதியுதவியோடு செயல்படுத்தப்படும் 50 ஆயிரம் வீடுகள் கட்டும் பணி தொடர்ந்து நடைபெற்றுக் கொண்டிருக்கிறது. மேலும், அதிக வீடுகளை கட்ட குறைந்த வட்டியில் கடன் வழங்க அரசின் வீட்டு வசதி அமைச்சகத்தை அணுகியுள்ளோம். இது தொடர்பான திட்டம் அமைச்சரவையின் ஒப்புதலுக்காக விரைவில் தாக்கல் செய்யப்படும்.

பாதிக்கப்பட்ட பகுதிகளில் நிவாரணப் பணிகள் முழுவீச்சில் நடைபெற்று வருகின்றன. பல்வேறு பகுதிகளில் தமிழர்கள், தங்களது பாரம்பரிய தொழிலான மீன் பிடிப்பு, விவசாயம் உள்ளிட்ட பணிகளில் ஈடுபடத் துவங்கி விட்டனர். மீன் பிடிப்பு தொழிலுக்கு விதிக்கப்பட்டிருந்த தடை முற்றிலும் விலக்கப்பட்டு விட்டது.

கிழக்குப் பிராந்தியத்தில் நிவாரணப் பணித் திட்டங்கள் வெற்றிகரமாக செயல்படுத்தப்பட்டு உள்ளன. எனவே, அரசின் கவனம் வடக்குப் பிராந்தியத்துக்கு திருப்பப்பட்டுள்ளது. இங்கு மேற்கொள்ளப்பட உள்ள மிகப்பெரிய உள்கட்டமைப்புத் திட்டம் அடுத்த ஆண்டு ஜனவரியில் துவங்கும் என்று எதிர்பார்க்கிறோம் என்று கருணா கூ‌றினா‌ர்.