ராமநாதபுரம் தொகுதி காங்., எம்.எல்.ஏ., ஹசன்அலிக்கு எதிராக தொடர்ந்து போஸ்டர் ஒட்டப்பட்டு வருவதால், கட்சியில் அவருக்கு கடும் நெருக்கடி ஏற்பட்டுள்ளது. ராமேஸ்வரத்தில் கடந்த சில தினங்களுக்கு முன் "எம்.எல்.ஏ., ஹசன் அலியை காணவில்லை; கண்டுபிடித்து கொடுத்தால் பரிசு' என, இந்து முன்னணியினர் போஸ்டர் ஒட்டி பரபரப்பை ஏற்படுத்தினர்.

இந்நிலையில், நாம் தமிழர் இயக்கம் சார்பில், "எம்.எல்.ஏ., ஹசன்அலியை வன்மையாக கண்டிக்கிறோம். தமிழக மீனவர்கள், இதுவரை, 548 பேர் கொலை. எம்.எல்.ஏ., அவர்களே, சட்டசபையில் நீங்கள் இலங்கை அதிபர் ராஜபக்ஷேயின் கைகூலியாக இருந்தால் மட்டும் போதுமா? ஓட்டுப் போட்ட மக்களுக்கு என்ன செய்தீர்கள்? தமிழர்களே சிந்திப்பீர்!' என, போஸ்டர் ஒட்டியுள்ளனர். தேர்தல் நெருங்கி வரும் நிலையில், காங்., நிர்வாகிகள் பலர், "சீட்' வாங்கும் முயற்சியில் உள்ளபோது, ஹசன்அலி எம்.எல்.ஏ., ""தனக்கு சீட் உறுதியாகிவிட்டது, தேவையில்லாமல் யாரும் செலவு செய்து ஏமாற வேண்டாம்,'' என, கட்சி நிர்வாகிகள் மத்தியில் கூறி வருகிறார். இந்நிலையில், ராமநாதபுரம் முழுவதும் அடிக்கடி எம்.எல்.ஏ.,வுக்கு எதிராக ஒட்டப்பட்டு வரும் போஸ்டரால், எம்.எல்.ஏ.,வுக்கு கட்சியில் நெருக்கடி ஏற்பட்டுள்ளதாக கட்சி வட்டாரங்கள் தெரிவிக்கின்றன.

ஹசன்அலி எம்.எல்.ஏ.,கூறும்போது, ""தேர்தல் நெருங்கி வரும் போது என் பெயரை கெடுக்கும் நோக்கத்தில் செய்கின்றனர். போஸ்டர் ஒட்டுபவர்கள் ஐந்தாண்டுகளாக எங்கு சென்றனர். ""தமிழக முதல்வர், வெளியுறவு துறை அமைச்சர் ஆகியோருக்கு, "தமிழக எம்.எல்.ஏ.,க்கள், முக்கிய அதிகாரிகள் கொண்ட குழு இலங்கைக்கு சென்று கண்டிப்புடன் பேசவேண்டும்' என, வலியுறுத்தி கடிதம் எழுதியுள்ளேன். இலங்கை அதிபருக்கும் கடிதம் எழுதியுள்ளேன். ""கைக்கூலியாக இருக்க வேண்டிய அவசியம் எனக்கு இல்லை. இலங்கை அதிபர் நண்பர் தான். ஆனால், தமிழக மீனவர்கள் பிரச்னை என வரும்போது, இலங்கை அதிபருக்கு எதிராக போராட்டம் நடத்தினால் முதல் நபராக போராட்டத்திற்கு வருவேன்,'' என்றார்.

இவரெல்லாம் ஒரு சட்டமன்ற உறுப்பினர்