நமது கவியருவி குழுவில் நடந்த 'ஆதலினால் காதல் செய்வீர்' கவிதைப் பரிசுப் போட்டியில் மரபு கவிதைப்பிரிவில் இரண்டாம் இடம் பெற்றுள்ள
கவிஞர் கருமலைத் தமிழாளன் அவர்களின் கவிதை..
(மரபுக்கவிதை)
ஆதலினால் காதல் செய்வீர்
பாவலர் கருமலைத்தமிழாழன்
பெண்ணழகைக் கண்டுநெஞ்சுள் கவர்ச்சி யாலே
-----பெருகிவரும் ஆசையது காத லன்று
கண்ணெதிரில் பெரும்பணத்தில் புரளும் ஆணைக்
-----கண்டுமனம் மயங்குவது காத லன்று
கண்ணோடு கண்நோக்கி அன்பு தோன்றி
-----கலந்துநெஞ்சில் பிறப்பதுதான் உண்மைக் காதல்
மண்மீதில் எதிர்ப்புகளை வென்றே யிங்கு
-----மகிழ்வாழ்வைத் தருமந்தக் காதல் செய்வீர் !
பூங்காவில் திரையரங்கு சாலை யோரம்
-----புரிகின்ற விளையாட்டு காத லன்று
பாங்காகக் கல்விகற்கும் பருவம் தன்னில்
-----பழகுவதும் பேசுவதும் காத லன்று
ஓங்கிகுலம் தழைப்பதற்கே மனங்கள் ஒன்றி
----ஓருயிர்தான் ஈருடலை இயக்கி யிங்கே
தீங்கிழித்துச் சமத்துவத்தைத் திகழச் செய்யும்
-----தீந்தமிழர் களவொழுக்கக் காதல் செய்வீர் !
சாதிகளை உடைத்தெறியும் ! மதங்கள் சொல்லும்
-----சாத்திரத்தைக் கிழித்தெறியும் ! உயர்வு தாழ்வை
நீதியெனச் சொல்லிவைத்த கயவர் தம்மின்
-----நீசமொழி பொய்மைகளின் தோலு ரிக்கும்
வீதிகளில் நடந்தாலே தீட்டாம் என்று
-----விதித்திருக்கும் ஆணவத்தை ஓட வைக்கும்
போதிக்கும் பொதுமைதனை ஆத லாலே
-----பொழிகின்ற அன்பினிலே காதல் செய்வீர் !
முகந்தன்னைப் பார்த்துப்பொன் நகைகள் கேட்டு
-----மூட்டையாகத் தரப்பணத்தட் சணையைக் கேட்டு
சுகந்தன்னைத் தருகின்ற பெண்ணைச் சந்தை
-----சுழிமாட்டை விலைபேசல் போலப் பேசித்
தகவின்றிப் பெண்மையினைக் கீழ்மை செய்யும்
-----தன்னலத்துப் பேய்களுக்குப் பாடம் சொல்ல
அகமிணைக்கும் அன்பாலே காதல் செய்வீர்
-----அழுக்குமனப் பெற்றோரைத் திருந்தச் செய்வீர் !