பார்வதி அம்மாள் உடலுக்கு ஆயிரக்கணக்கான மக்கள் அஞ்சலி; நாளை தகனம்

நேற்று காலமான
விடுதலைப் புலிகள் தலைவர் பிரபாகரனின் தாயார் பார்வதி அம்மாளின் இறுதிச்
சடங்கு நாளை நடைபெற உள்ள நிலையில், அவரது பூதவுடலுக்கு ஆயிரக்கணக்கான
மக்கள் அஞ்சலி செலுத்தி வருகின்றனர்.

பார்வதியம்மாளின்
பூதவுடல் தீருவில் சதுக்கத்தில் நேற்று மாலை 5 மணி முதல் மக்கள்
அஞ்சலிக்காக வைக்கப்பட்டிருந்தது. அங்கு ஊர்மக்கள் தொடர்ச்சியாக வந்து
அஞ்சலி செலுத்தினர்.

பார்வதி அம்மாளின் இறுதிச் சடங்குகள் நாளை மாலை 4 மணிக்கு நடைபெறவுள்ளன.

இன்று
மாலை 5 மணி வரை தீருவிலில் அன்னை பார்வதியம்மாளின் உடல் அஞ்சலிக்காக
வைக்கப்படும். பின்னர் வல்வெட்டித்துறையில் உள்ள அவரது மகளின் இல்லத்தில்
நாளை அஞ்சலிக்காக வைக்கப்பட்டு, இறுதிக்கிரியைகள் நடைபெற்று மாலை 4
மணிக்கு தகனத்துக்காக எடுத்துச்செல்லப்படும் என தெரிவிக்கப்பட்டுள்ளது.

பார்வதி அம்மாளின் இறுதிச் சடங்கில் கலந்துகொள்ள விடுதலை சிறுத்தைகள் அமைப்பின் தலைவர் தொல்.திருமாவளவன் இலங்கை வருகிறார்.

திருமாவளவன்
ஏற்கனவே ஒரு தடவை வல்வெட்டித் துறைக்கு வருகை தந்து பார்வதி அம்மாளைச்
சந்தித்து அவரது நலன் குறித்து விவரமறிந்து சென்றிருந்ததும்
குறிப்பிடத்தக்கது.

பார்வதி
அம்மாளின் மறைவுக்கு அஞ்சலி செலுத்தும் வகையில் கறுப்புக் கொடிகளைக் கட்ட
வேண்டாம். அஞ்சலி செலுத்தும் சுவரொட்டிகளில் பிரபாகரனின் பெயரைப்
பயன்படுத்த வேண்டாமென இராணுவத்தினர் கடுமையாக உத்தரவிட்டுள்ளனர் என யாழ்.
மாவட்ட கூட்டமைப்பு நாடாளுமன்ற உறுப்பினர் எஸ்.சிறிதரன் தெரிவித்தார்.

இராணுவத்தினரின்
உத்தரவையும் மீறி, மக்கள் வீடுகளிலும், வர்த்தக நிலையங்களிலும் கறுப்புக்
கொடியைப் பறக்கவிட்டுள்ளனர்.பிரபாகரன் பெயரைக் கொண்ட அஞ்சலி சுவரொட்டிகளை
இராணுவத்தினர் இளைஞர்களைக் கொண்டு அகற்றி வருகின்றனர்.

அஞ்சலி
சுவரொட்டிகளில் பிரபாகரன் பெயரைப் பயன்படுத்த வேண்டாம் என்றும்,
"வேலுப்பிள்ளை பார்வதி அம்மாள்" எனப் போடும்படியும் இராணுவத்தினர்
உத்தரவிட்டுள்ளதாக தகவல்கள் தெரிவிக்கின்றன.