கதை சொல்லச் சென்ற ஐந்துக்கும் மேற்பட்ட உதவி இயக்குநர்களிடம் கதைச் சுருக்கத்தையும், அவரது கேரக்டர் என்ன என்பதை மட்டும் கேட்டுவிட்டு, சாரி சார் கதைபிடிக்கல என்று முகத்துக்கு நேராகச் சொல்லித் திரும்ப அனுப்பிவிட்டார் அஞ்சலி. கதையைப் பற்றி அஞ்சலிக்கு என்ன தெரியும் என்று குமைந்தார்கள் பாதிக்கப்பட்ட உதவி இயக்குநர்கள்.

இப்படி ஒரு சம்பவத்தைக் கேள்விப்பட்டு, உண்மையைத் தெரிந்துகொள்ள அஞ்சலியை மடக்கினோம் தொலைபேசி வழியாக. “கதை சரியில்லை என்பதற்காக வரிசையாக மூன்று தெலுங்குப் படங்களை வேண்டாம் என்று சொல்லிவிட்டேன். இங்கே சமீபத்தில் கேட்ட கதைகள் அதைவிட மோசம் சார். பணத்துக்காக படங்களை ஒப்புகொண்டால் நீண்டநாள் நிற்க முடியாது. இதை நான் சொல்லித்தான் தெரிய வேண்டும் என்பதில்லை” என்று காட்டமாக ஆரம்பித்தார் நம்மிடம்.

தூங்கா நகரம் படத்தில் நடித்து முடித்தக் கையோடு ஏ.ஆர். முருகதாஸ் தயாரிப்பில் அவரது உதவியாளர் சரணவன் இயக்கிவரும் பெயரிடப்படாத படத்தில் நடிக்க கால்ஷீட் கொடுத்திருக்கிறார் அஞ்சலி. இதில் ஜெய்க்கு ஜோடியாக, வலுவான ஒரு பாத்திரத்தில் நடிக்கிறாராம். இனி பிரபலமான பெரிய ஹீரோக்களோடு மட்டும்தான் நடிப்பேன் என்று சொன்ன அஞ்சலி, அதை இந்தப் படத்திலிருந்து கடைபிடிக்க ஆரம்பித்திருக்கிறேன் என்றார். ஆனாலும் இந்த வாய்ப்பை ஒப்புக்கொண்டது இந்தக் கதாபாத்திரத்துக்காக மட்டும்தான் என்கிறார். அப்படியென்ன அபூர்வமான கதாபாத்திரம்?

“அங்காடித் தெரு படம் வெளிவந்த பிறகு என்னிடம் நிறைய எதிர்பார்க்கிறார்கள். ஆனால் கனி கேரக்டர் போல முக்கியத்துவம் உள்ள வேடங்கள் அமைய வேண்டுமே? ஏ.ஆர்.முருகதாஸ் சார் தயாரிப்பில் நடிக்கும் படத்தில் கனி கேரக்டர் மாதிரி அழுத்தமான கேரக்டர் கிடைத்துள்ளது. இந்தப் படத்தில் நடிக்க அழைப்பு வந்தபோது நான் வேறு படங்களில் பிஸியாக இருந்தேன். அதனால் படத்திற்கு தேதி ஒதுக்குவதில் கொஞ்சம் சிரமம் இருந்தது. அப்போது ஏ.ஆர். முருகதாஸ் சார் என்னைக் கூப்பிட்டு, ‘முதலில் கதையைக் கேளுங்கள், அப்புறம் சொல்லுங்கள்` என்றார். கதையைக் கேட்டதும் உடனே நடிக்க ஒப்புக்கொண்டேன். இந்தப் படத்தில் மாறுபட்ட ஒரு அஞ்சலியை நீங்கள் பார்க்கலாம்” என்கிறார்.

‘‘கிளாமராக நடிப்பீர்களா என்று என்னிடம் கேட்கிறார்கள். நான் இன்னும் அந்த எல்லைக்குள் போகவில்லை. இப்படிக் கூறுவதால் நான் கிளாமராக நடிக்க மாட்டேன் என்று அர்த்தம் இல்லை. என்னிடம் நான்கு டூயட் வேண்டுமா? நடிக்க வாய்ப்புள்ள நான்கு காட்சிகள் வேண்டுமா என்று கேட்டால், முதலில் நான்கு காட்சிகளைக் கொடுங்கள் என்றுதான் சொல்வேன்’’ என்கிறார் அஞ்சலி!

இன்னும் இரண்டு ஆண்டுகளுக்குள் தேசிய விருது வாங்கிவிட வேண்டும் என்ற ஊக்கம்தான் அவளை இப்போது கறாராக மாற்றியிருக்கிறது என்கிறார் அஞ்சலியின் அம்மா

-தமிழ் உலகம்-

பகிர்வுக்கு நன்றீ தோழி