வானம் -சிங்கை டாக்டர் மா.தியாகராசன்

by **Dr Maa Thyagarajan** Sun Mar 20, 2011 4:43 pm

வானம்
சிங்கை டாக்டர் மா.தியாகராசன்
drthyagarajan2010@g,ai;.com

ஒவ்வொரு நாளும்
ஒரு செய்தி தெரிவிக்கும்
கவிஞர்களின் போதிமரமே!

உன் நெற்றியில் நீ வைத்த
வட்ட
பொட்டுக்களோ
சூரிய சந்திரன்!

நீ தலையில் சூடிவிட்டுத் தூக்கியெறிந்த
பூக்களோ
சூரிய சந்திரன் !

உன்னைப் பார்த்து விடக்கூடாது என்பதற்காக
நீ போட்டுக் கொண்ட
வண்ணமுக்காடு தான்
வான வில்லோ!

உலகில் நடக்கும்
வன்முறைகளையும்
தீவிர வாதங்களையும்
கண்டு நீ பொறுக்காமல்
வடிக்ககும் கண்ணீர் தான் மழையோ!

உன் கழுத்துக்கு
நீ அணிந்து கொள்ளும்
யாரிடமும் இல்லாத
புது வைரம் தான் மின்னலோ!

கடல் உன்னிடமிருந்து
நீலத்தைத் திருடிவிட்டதால்
நீ கடலில் உள்ள மீன்களை
உன்மேனியில் வைத்துக் கொண்டாயே
அது தான் விண்மீன்களோ?

உன்னைக் காணும் போது
முருகன் தான் நினைவுக்கு வருகிறான்
சூரியன் சந்திரன் இருவரும்
வள்ளிதெய்வானையாய்க் காட்சிதருகிறார்கள்!

வள்ளுவன் குறளுக்கேற்ப
நீ உலகைப் பெய்தும் கெடுக்கிறாய்!
பொய்த்தும் கெடுக்கிறாய்!

இராமநாதபுர மக்களை எப்போதும்
நீ சுட்டெரிப்பதால்
வானம் என்னும் அசட்டுக் குழந்தை
அழ மறுத்ததால் எங்கள்
வாழ்க்கை வயல் காய்ந்து கிடக்கிறது என்று
ஒப்பாரி வைக்கின்றனர்1

உலகத் தமிழர்களே
ஒன்று கூடுங்கள்
என்று நீ முழங்கிடும்
தமிழ் முழக்கம் தான்
இடிமுழக்கமோ!

எழுத்து
சிங்கை டாக்டர் மா.தியாகராசன்
drthyagarajan2010@g,ai;.com