வெள்ளைக் கொடி வழக்கு விசாரணைக்காக இன்று நீதிமன்றுக்கு அழைத்து வரப்பட்ட சரத் பொன்சேகாவை நெருங்கிச் செல்வதற்கு ஊடகவியலாளர்களை பொலிசார் அனுமதிக்கவில்லை.

அவரைப் புகைப்படம் மற்றும் வீடியோ எடுப்பதாக இருந்தாலும் தூரத்தில் இருந்தே எடுத்துக் கொள்ளுமாறு பொலிஸ் அத்தியட்சகர் ஒருவர் கண்டிப்பான தொனியில் ஊடகவியலாளர்களிடம் எச்சரித்திருந்தார்.

அத்துடன் சரத் பொன்சேகா நீதிமன்ற வளாகத்தினுள் நுழைந்தவுடன் அவரை ஊடகவியலாளர்கள் உட்பட யாரும் நெருங்க முடியாத வண்ணம் சீருடை மற்றும் சிவில் உடை தரித்த பெருமளவான பொலிசார் கடமையில் ஈடுபடுத்தப்பட்டிருந்தனர்.

ஆயினும் பொலிசாரின் கடுமையான கண்டிப்பையும் மீறி ஊடகவியலாளர்கள் சரத் பொன்சேகாவை நெருங்கிச் சென்று புகைப்படம் எடுத்திருந்தனர்.

பொன்சேகா ஊடகவியலாளர்களிடம் ஏதாவது கருத்துத் தெரிவிப்பதைத் தடுக்கும் நோக்கிலேயே பொலிசார் இன்று அவ்வாறான கட்டுப்பாடுகளை விதித்திருக்கக் கூடும் என்று அது பற்றி எம்மிடம் கருத்துத் தெரிவித்த ஊடகவியலாளர் ஒருவர் தெரிவித்தார்.

இதே வேளை வெள்ளைக் கொடி வழக்கின் அரச தரப்பு சாட்சியான சண்டே லீடர் ஆசிரியர் பிரெட்ரிக்கா இன்றும் பலத்த பாதுகாப்புடன் நீதிமன்றுக்கு அழைத்து வரப்பட்டார்.

வெள்ளைக்கொடி வழக்கு தொடர்பாக பத்திரிகை வாயிலாக விமர்சனங்கள் முன்வைப்பது தொடர்பில் அவர் இன்று நீதிபதிகளால் கடுமையாக எச்சரிக்கப்பட்டமை இன்றைய நீதிமன்ற விசாரணையின் போது நடைபெற்ற குறிப்பிடத்தக்க விடயமாகும்.

இரண்டாம் இணைப்பு

இறுதி யுத்தத்தின் போது வெள்ளைக்கொடியுடன் சரணடைய வந்த தமிழீழ விடுதலை புலிகளின் சிரேஸ்ட உறுப்பினர்களை கொலை செய்ய பாதுகாப்பு செயலாளர் கோத்தபாய ராஜபக்ச தெரிவித்தாக, முன்னாள் இராணுவ தளபதி சரத் பொன்சேகா கூறியதாக சண்டேலீடர் பத்திரிகையில் வெளியான செய்தி தொடர்பான வழக்கு விசாரணை இன்று கொழும்பு மேல் நீதிமன்றத்தில் நடைபெற்றது

இதன் போது இந்த வெள்ளைக்கொடி தொடர்பான எவ்வித அறிக்கைகளையும் சண்டே பத்திரிகையில் பிரசுரிக்க கூடாது என, கொழும்பு மேல்நீதிமன்றம் பத்திரிகையின் ஆசிரியரும் சரத் பொன்சேகாவை பேட்டி கண்டவரும் வழக்கின் சாட்சியாளருமான பிரெட்றிகா ஜேன்ஸ்சுக்கு எச்சரிக்கை விடுத்துள்ளது

இந்த வழக்கு விசாரணையில், இன்றும் பிரதிவாதியான சரத் பொன்சேகாவின் சட்டத்தரணி, பிரெட்ரிக்கா ஜேன்ஸிடம் குறுக்கு விசாரணைகள் மேற்கொண்டார்.

இதன்போது அவர், வழக்கு விசாரணை நடந்துக்கொண்டிருக்கும் போது சண்டே லீடர் பத்திரிகையில் வெள்ளை கொடி வழக்கு தொடர்பான பல முரண்பாட்டு அறிக்கைகளை சாட்சியாளரான பிரெட்ரிக்கா ஜேன்ஸ் வெளியிட்டு வருவதாக கூறி அதற்கான ஆதாரங்களை சமர்ப்பித்தார்.

இதற்கு பதில் அளித்த சாட்சியாளரான பிரெட்ரிக்கா ஜேன்ஸ் சில செய்திதாள்கள் வெள்ளைக்கொடி விடயம் தொடர்பாக உண்மைக்கு புறம்பான செய்திகளை வெளியிட்டு வருகின்றன
எனவே அவற்றுக்கு பதிலளிப்பதற்காகவே தாம் அறிக்கைகளை வெளியிட்டு வருவதாக குறிப்பிட்டார்

இதனை கண்டித்த நீதிமன்றம் ஊடகங்களின் உண்மைக்கு புறம்பான செய்திகளை மன்றில் சமாப்பிக்குமாறும் அவற்றுக்கு எதிராக அறிக்கைகளை சண்டேலீடர் பத்திரிகையில் வெளியிடவேண்டாம் என்றும் பிரெட்ரிக்கா ஜேன்ஸ்சுக்கு எச்சரிக்கை விடுத்தது

இதேவேளை முன்னாள் இராணுவ தளபதியும் ஜனநாயக தேசிய கூட்டமைப்பின் தலைவர் சரத் பொன்சேகாவின் நாடாளுமன்ற உறுப்புரிமையை நீக்கப்பட்டமைக்கு எதிராக இடைக்கால தடையுத்தரவை வழங்க கோரி தாக்கல் செய்யப்பட்ட மனு தொடர்பான விசாரணையை மேற்கொள்ள மேன்முறையீட்டு நீதிமன்றத்தில் இன்று மேலும் ஒரு நீதியரசர் பெயரிடப்பட்டுள்ளார். ஏ. டபிள்யூ.ஏ சலாம் புதிய நீதியரசராக இந்த குழுவில் இணைக்கப்பட்டுள்ளார்.

இதற்கு முன்னர் இந்த வழக்கு இரண்டு நீதியரசர்களை கொண்ட குழுவினரின் முன்னிலையில் விசாரணை செய்யப்பட்டு வந்தது. இதன்படி நாளை இந்த வழக்கு விசாரணைக்கு எடுத்துக்கொள்ளப்படவுள்ளது

தமிழ்வின்

தகவலுக்கு நன்றீ