மராட்டிய முதல்வர் பதவிக்கு பிரிதிவிராஜ் பெயர் தேர்வு செய்யப்பட்டுள்ளது. பிரிதிவிராஜ் தேர்வு செய்யப்பட்டதை சோனியாகாந்தி அதிகாரப்பூர்வமாக அறிவிக்க உள்ளார்.

கார்கில் போரில் உயிர்நீத்த ராணுவத்தினரின் குடும்பங்களுக்கு வீடு வழங்குவதற்காக, மும்பை கொலாபாவில் ஆதர்ஷ் கூட்டுறவு வீட்டு வசதிச் சங்க குடியிருப்பு கட்டப்பட்டது.

ஆனால் இக்கட்டிடத்தில் முதல்வர் அசோக் சவானின் உறவினர்கள், முன்னாள் ராணுவ தளபதிகள், மூத்த அரசு அதிகாரிகள், மூத்த அரசியல்வாதிகள் ஆகியோருக்கு வீடுகள் ஒதுக்கீடு செய்யப்பட்டது சர்ச்சையை ஏற்படுத்தியது.

இந்த ஊழல் நாடு தழுவிய அளவில் பெரும் புயலை கிளப்பியதைத் தொடர்ந்து, காங்கிரஸ் தலைவர் சோனியாகாந்தியின் உத்தரவின்பேரில், மராட்டிய முதல்வர் அசோக் சவான் தனது பதவியை ராஜினாமா செய்தார்.

நேற்று கவர்னர் கே.சங்கர நாராயணனை சந்தித்து முறைப்படி ராஜினாமா கடிதம் கொடுத்தார்.

அசோக் சவான் பதவி விலகியதைத் தொடர்ந்து, புதிய முதல்வர் பதவிக்கு மராட்டிய மாநிலத்தைச் சேர்ந்த மத்திய மந்திரிகள், மாநில மந்திரிகள் என பலரது பெயர்கள் அடிபடத் தொடங்கியது. மராட்டிய வருவாய்த்துறை மந்திரி நாராயண் ரானே, வனத்துறை மந்திரி பதங்ராவ் கதம் உள்பட பலரும் முதல்வர் பதவிக்கான போட்டியில் இறங்கினர்.

எனினும் தற்போது மத்திய மந்திரியாக இருக்கும் பிரிதிவிராஜ் சவானின் பெயர் முன்னணியில் இருந்தது. இவரை அடுத்து மத்திய எரிசக்தி துறை மந்திரியாக உள்ள சுஷில்குமார் ஷிண்டேவின் பெயரும் பரிசீலிக்கப்பட்டது.

அதே சமயம் மராட்டிய போக்குவரத்து மந்திரி ராதாகிருஷ்ண விக்கே பாட்டீல், விவசாயத் துறை மந்திரி பாலா சாகேப் தொராட் ஆகியோரின் பெயர்களும் தீவிரமாக அடிபட்டன. இவர்கள் தவிர்த்து மராட்டியத்தைச் சேர்ந்த மத்திய மந்திரிகளான குருதாஸ் காமத், முகுல் வாஸ்னிக் போன்றோரும் போட்டியில் இருந்தார்கள்.

முதல்வர் போட்டியில் இருக்கும் பாலாசாகேப் தொராட்டுக்கு, தற்போது மத்திய மந்திரியாக இருக்கும் மராட்டிய முன்னாள் முதல்வரான விலாஸ் ராவ் தேஷ்முக்கின் பலமான ஆதரவு இருந்தது.

இந்த நிலையில் புதிய முதல்-மந்திரியை தேர்வு செய்ய சட்டமன்ற காங்கிரஸ் கட்சி எம்.எல்.ஏ.க்களின் கூட்டம் நேற்று இரவு மும்பையில் நடைபெற்றது. இதில் மேலிடப் பார்வையாளர்களாக மூத்த மத்திய மந்திரிகளான பிரணாப் முகர்ஜியும், ஏ.கே.அந்தோணியும் கலந்து கொண்டனர்.

கூட்டத்தில் எம்.எல்.ஏ.க்களின் கருத்துக்களை மேலிடப் பார்வையாளர்கள் இருவரும் கேட்டறிந்தனர். பின்னர் புதிய முதல்-மந்திரியை முடிவு செய்யும் அதிகாரத்தை கட்சி தலைவர் சோனியாகாந்திக்கு வழங்கி தீர்மானம் நிறைவேற்றப்பட்டது.

புதிய முதல்வர் தேர்வு பற்றி ஏ.கே.அந்தோனி,பிரணாப்முகர்ஜி ஆகியோருடன் சோனியாகாந்தி இன்று ஆலோசனை நடத்தினார். ஆலோசனையின் முடிவில் பிரிதிவிராஜ் முதல்வராக தேர்வானார்.

பிரிதிவிராஜ் தேர்வு செய்யப்பட்டதை சோனியாகாந்தி அதிகாரப்பூர்வமாக அறிவிக்க உள்ளார்.