கர்நாடக சங்கீத மூத்த வித்வான்; பழுத்த இசை ஞானம் உள்ளவர்; சங்கீத நிபுணர்; ஆய்வாளர்;எல்லாவற்றுக்கும் மேலாக, தலைசிறந்த குருவாக தன்னை அண்டியவர்களுக்கு இசை போதித்து, அவர்களுடைய சந்தேகங்களை போக்கி உற்சாகப்படுத்திப் பார்த்த இசை ஆச்சார்யன். இப்படி, பல சிறப்புகளைப் பெற்றிருந்த சங்கீத கலாநிதி டி.கே.கோவிந்தராவின் மறைவு, சங்கீதத்திற்கு ஈடுசெய்ய முடியாத பேரிழப்பாகும்.
சங்கீத நாடக அகடமி விருது, சங்கீத கலாநிதி விருதுகள் பெற்ற பெருமையுடைய கோவிந்தராவ், 82,புகழ்பெற்ற மூத்த வித்வான் செம்பை வைத்யநாத பாகவதர், டி.பிருந்தா, இசை சிம்மம் முசிறி சுப்ரமண்ய அய்யர் ஆகிய பிரபலங்களிடம் இசை பயின்றவர். சம்பிரதாய இசை பாணிக்கு புகழ் சேர்த்தவர்.
சங்கீத கலாநிதிகள் பம்பாய் சகோதரிகளின் அருமை குரு. பன்மொழி வல்லுனர். குறிப்பாக, ஸ்ரீ புரந்தரதாசருடைய கீர்த்தனங்களை அவரிடம், பிரபல விதூஷி அமரர் எம்.எல்.வி., போன்றோர் கூட, அணுகி கற்றுக் கொண்டனர். எளிமையும், பண்பும், பாசமும் காட்டி, சீடர்களை வழிநடத்திய தலைசிறந்த குரு அவர் என்று, அவருடைய மாணவ மணிகள் மனம் நெகிழ கூறிப் புகழ்ந்தனர்.
சங்கீத மும்மூர்த்திகளுடைய சாகித்யங்களை, ஸ்வர - தாள குறிப்புகளுடன் அனைவருக்கும் புரியும்படி, புத்தக வடிவில் வெளியிட்டு (ஆங்கிலம்) பாராட்டப் பெற்றவர். பெரியசாமி தூரனின் சாகித்யங்களுக்கு மதுரமாக மெட்டமைப்பு செய்து, கேட்பவர்களை உருக வைத்த திறமை அவருடையது என்பது, நெஞ்சம் நெகிழ வைக்கும் உண்மை. சங்கீத கலாநிதி கோவிந்தராவிற்கு, ஹைமாவதி என்ற மனைவியும், மூன்று புதல்விகளும், ஒரு மகனும் உள்ளனர். இவரின் இழப்பு, ஈடுசெய்ய முடியாத இழப்பாக உள்ளது துர்பாக்கியமே!
-மாளவிகா