சங்கத்தமிழ் அனைத்தும் தா ! முனைவர் ச .சந்திரா

by **eraeravi** Sun Nov 14, 2010 11:37 pm

சங்கத்தமிழ் அனைத்தும் தா ! முனைவர் ச .சந்திரா

குமரிமுனையில் மோதும் முக்கடலின் பேரொலியாய்

குவலயம்முழுதும் முழங்குகிறது சங்கத்தமிழ் இன்று !

கூடலும் ஊடலுமாய் ஏக்கமும் தாக்கமுமாய்

பரிவும் பிரிவுமாய் களவு கற்பென அகத்திணையிருக்க

நில்லாமையும் நிலையாமையுமாய் மானமும் தானமுமாய்

வாளாண்மை தோளாண்மை கோலாண்மையெனப் புறத்திணையிருக்க

கடலரக்கனின் கோரப்பசிக்கு இரையாகிப்பின் எச்சமாயிருக்கும்

சங்கத்தமிழ் யாவும் இலக்கிய உணர்வின் உச்சம் !

பதிற்றுப்பத்தின் முதலும்முடிவும் பரிபாடலின் மிச்சமுமென

கிட்டியும் கிட்டாமலுமான சங்கத்தமிழ் ஒருபுறமிருக்க

பகுத்தும் தொகுத்தும் பதிப்பித்தும் புதிப்பித்தும்

சங்கப்பொருண்மைப் புதையலை வெளிக்கொணர்ந்தோர் மறுபுறமிருக்க

பாட்டும் தொகையும் மாய்ந்து மாய்ந்து சொல்லியப் பண்புக்குவியலை

காலதேவனின் ஓட்டம் உதைத்ததும் சிதைத்ததும் நியாயமோ ?

இனி தேன்மயங்கு பாலினுமினிய எனப்புகுந்தவீட்டுப்

பெருமைபேசும் மாண்புறு மகளிர் வேண்டும் !

வினையே ஆடவர்க்கு உயிரே என்றுகூறும் ஆண்கள் வேண்டும் !

பெற்றப் பெருவளம் பெறார்க்கு அறிவுறுத்தும்

பெருந்தன்மைமிகு மானிடர் வேண்டும் !தமிழன்னையே !

வல்லாங்கு வாழ்வோம் என எண்ணாது

பல்லுயிர் ஓம்பும் பண்பட்ட மாந்தன் வேண்டும் !

குளம்தொட்டு வளம்பெருக்கும் வல்லவன் வேண்டும் !

சங்கத்தமிழ் மூன்றும் தா !என ஔவையார் கேட்டகாலம் அன்று !

சங்கத்தமிழ் கூறும் பண்பாளர்களைத் தா !எனக்கேட்கும் காலம் இன்று !
முனைவர் ச .சந்திரா

-- சங்கத்தமிழ் அனைத்தும் தா ! முனைவர் ச .சந்திரா 650574