முதல் விருந்து…(பாமாலிகை (கதம்பம்- பகுதி2) - வேதா. இலங்காதிலகம்.

முதல் விருந்து…

நாளின் ஆரம்பம் இனிய
நாதசுர ஓசை போல
ஆதாரமாகும் முதற் தேநீர்
தோதாகும் சுவைப் பானம்.
என்ன சுவை! ஆகா!
என்ன இனிமை! இனிமை!
கன்னற் சுவை, முதற்
கிண்ணம் பால் தேநீர்.
மனம் சுவைக்கச் சுவைக்க
நா இனிக்க இனிக்க
பால் மணக்க மணக்க
வெண்மை நுரைக்கும் நுரைக்கும்.
ஆவி பறக்கப் பறக்க
ஆவல் ததும்பத் ததும்ப
உதடு உறிஞ்சி உறிஞ்சி
உணர்ந்து சுவைக்கும் சுவைக்கும்.
அதிகாலைப் பொழுதில்
புதிதாக எதிர்பார்க்கும்
மதிப்புடை புதுத் தேநீரால்
உதித்திடும் சுறுசுறுப்பு.
நீண்ட இரவில் ஆக்கை
கொண்ட ஓய்வின் பின்னர்
மீண்டும் புதிய நாளை
வேண்டும் உற்சாகம் தரும்.
விதைக்குள் உறங்கும் உயிரை
புதைக்காது உசுப்பும் மழையாக
விதைக்கும் சுறுசுறுப்பு முதல்
விருந்தாகும் ஒரு தேநீர்.
பா ஆக்கம் வேதா. இலங்காதிலகம்.
ஓகுஸ், டென்மார்க்.
15-10-2010.