அபுதாபியில் நடந்த கடைசி சுற்று பார்முலா 1 கார் பந்தயத்தில் ஜெர்மனி வீரர் வெற்றி பெற்று, உலக சாம்பியன் பட்டத்தையும் கைப்பற்றினார்.

உலகின் பெரிய கார்பந்தய போ‌ட்டியான பார்முலா 1 கார்பந்தயம் 2010ஆம் ஆண்டுக்கான சீசனில் மொத்தம் 19 சுற்றுகளாக நடத்தப்பட்டது. இதில் 19வது மற்றும் கடைசி சுற்று பந்தயமான அபுதாபி கிராண்ட்பிரி பந்தயம் அபுதாபியில் நடந்தது. வழக்கம் போல் 12 அணிகளை சேர்ந்த 24 வீரர்கள் கலந்து கொண்டனர். புதிய உலக சாம்பியன் யார்? என்பதை நிர்ணயிக்கும் போட்டியாக அது அமைந்ததால் பலத்த எதிர்பார்ப்பை ஏற்படுத்தி இருந்தது.

போட்டிக்கான தூரம் (55 சுற்று) 305 கிலோ மீட்டர் ஆகும். இதில் ஜெட் வேகத்தில் காரை ஓட்டி ஆதிக்கம் செலுத்திய ஜெர்மனியைச் சேர்ந்த ரெட்புல்-ரெனல்ட் அணி வீரர் செபாஸ்டியன் வெட்டல் 1 மணி 39 நிமிடம் 36.837 வினாடிகளில் இலக்கை எட்டி முதலிடத்தை பிடித்தார். இந்த சீசனில் அவர் பெற்ற 5வது வெற்றி இதுவாகும். முதலிடம் பிடித்த அவருக்கு 25 புள்ளிகள் கிடைத்தன.

அவரை விட 10.1 வினாடிகள் பின்தங்கிய மெக்லரன்-மெர்சிடஸ் அணி வீரர் இங்கிலாந்தின் லிவிஸ் ஹாமில்டன் 2வது இடத்தை பிடித்து, அதற்குரிய 18 புள்ளிகளை பெற்றார். கடந்த ஆண்டு சாம்பியன் ஜென்சன் பட்டன் (இங்கிலாந்து) 3வது இடத்தை (15 புள்ளி) பிடித்தார். இரண்டு முறை சாம்பியனான ஸ்பெயின் வீரர் பெர்னாண்டோ அலோன்சா (பெராரி அணி) 7வதாக வந்தார். அவருக்கு 6 புள்ளிகளே கிடைத்தன.

19 சுற்றுகள் முடிவில் மொத்தம் அதிக புள்ளிகள் குவித்து (256 புள்ளி) முதலிடம் பிடித்த ஜெர்மனியின் செபாஸ்டியன் வெட்டல் புதிய பார்முலா 1 உலக சாம்பியன் மகுடத்தை சூடினார். அத்துடன், 23 வயது 134 நாட்கள் நிரம்பிய அவர் இளம் வயதில் இப்பட்டத்தை வென்ற வீரர் என்ற பெருமையையும் பெற்றார்.

சாம்பியன்ஷிப் வாய்ப்பில் அலோன்சா 252 புள்ளிகளுடன் 2-வது இடத்தை பிடித்தார். அவர் அபுதாபி பந்தயத்தில் 2வது இடத்தை பிடித்திருந்தால் சாம்பியன் ஆகி இருப்பார். ஆஸ்‌ட்ரேலியாவின் மார்க் வெப்பர் (242 புள்ளி), ஹாமில்டன் (240 புள்ளி), ஜென்சன் பட்டன் (214 புள்ளி) அடுத்த இடங்களை பெற்றனர்.

இதே போல் அணிகளுக்கான சாம்பியன்ஷிப் பட்டத்தையும் வெட்டலின் அணியான ரெட்புல் ரெனல்ட் (498 புள்ளி) தட்டிச் சென்றது. மெக்லரன் மெர்சிடஸ் அணி 454 புள்ளிகளுடன் 2வது இடத்தை பெற்றது.