பாமக நிறுவனர் ராமதாஸ் வெளியிட்டுள்ள அறிக்கையில்,

சென்னை கோட்டூர்புரத்தில் செயல்பட்டு வந்த அண்ணா நூற்றாண்டு நூலகம் அங்கிருந்து எழும்பூரிலுள்ள டி.பி.ஐ. வளாகத்திற்கு மாற்றப்படும் என்றும், அந்த இடத்தில் குழந்தைகள் நல மருத்துவமனை அமைக்கப்படும் என்றும் தமிழக முதலமைச்சர் ஜெயலலிதா அறிவித்திருக்கிறார்.


தமிழக அரசின் இந்த முடிவு கடும் அதிர்ச்சி அளிக்கிறது. கோட்டூர்புரத்தில் 8 ஏக்கர் பரப்பளவில் 170 கோடி ரூபாய் செலவில் கட்டப்பட்டுள்ள அறிஞர் அண்ணா நூற்றாண்டு நூலகத்தில் குழந்தைகள் முதல் பார்வையற்றோர் வரை அனைவரும் தங்களுக்குத் தேவையான புத்தகங்களை படிப்பதற்கு வசதிகள் உள்ளன.


ஆராய்ச்சி மாணவர்களுக்கும், போட்டித் தேர்வுகளுக்கு படிப்பவர்களுக்கும் இது ஒரு கோவிலாக திகழ்ந்து வருகிறது. இந்த நூலகம் மிகப்பெரிய தகவல் களஞ்சியமாக மட்டுமின்றி சென்னை மாநகரின் புதிய அடையாளமாகவும் உள்ளது. இத்தகைய வசதி கொண்ட நூலகத்தை இடமாற்றம் செய்துவிட்டு, அங்கு குழந்தைகள் நல மருத்துவமனையை அமைப்பது நடைமுறை சாத்தியமில்லாதது.


சென்னையில் புதிய குழந்தைகள் நல மருத்துவமனை அமைப்பதை யாரும் எதிர்க்கவில்லை. ஏற்கெனவே சென்னை எழும்பூரில் செயல்பட்டுவரும் குழந்தைகள் நல மருத்துவமனை கவனிப்பாரின்றி சீர்கெட்டு கிடக்கிறது. அதை முதலில் சீரமைக்க வேண்டும். சென்னையில் அரசுக்கு சொந்தமான எவ்வளவோ இடங்கள் உள்ளன. அங்கு இந்த மருத்துவமனை அமைக்கப்பட்டால் அதை அனைவரும் வரவேற்பார்கள்.


மாறாக செயல்பட்டுக் கொண்டிருக்கும் ஒரு நூலகத்தை அகற்றிவிட்டு அங்கு மருத்துவமனை அமைக்கப் போவதாக கூறுவது அறிவார்ந்த செயலல்ல. அதுமட்டுமின்றி எழும்பூரிலுள்ள டி.பி.ஐ. வளாகத்தில் ஏற்கெனவே கடுமையான இட நெருக்கடி நிலவுகிறது. அங்கு சுமார் 4 இலட்சம் சதுரஅடி பரப்பளவில் அண்ணா நூற்றாண்டு நூலகத்தை அமைப்பது அவ்வளவு எளிதல்ல. ஏற்கெனவே சென்னை கோட்டையில் செயல்பட்டு வந்த பாவேந்தர் செம்மொழி தமிழ் ஆராய்ச்சி நூலகம் அங்கிருந்து மாற்றப்பட்டது. அந்த நூலகம் புதிய தலைமைச் செயலகக் கட்டடத்தில் செயல்படும் என்று அறிவிக்கப்பட்ட போதிலும் இன்றுவரை அதற்கான நடவடிக்கைகள் எடுக்கப்படவில்லை.


முந்தைய ஆட்சியில் கட்டப்பட்டது என்ற ஒரே காரணத்திற்காக அண்ணா நூற்றாண்டு நூலகத்தை இடமாற்றம் செய் வது கண்டிக்கத்தக்கது. இந்த முடிவை கைவிட்டு அனைத்து வசதிகளுடன் கூடிய அண்ணா நூற்றாண்டு நூலகம் தொடர்ந்து அதே இடத்தில் செயல்படும் என்று தமிழக முதலமைச்சர் ஜெயலலிதா அறிவிக்க வேண்டும் என வலியுறுத்துகிறேன்.


இவ்வாறு ராமதாஸ் தனது அறிக்கையில் கூறியுள்ளார்.

நன்றி : நக்கீரன்

நூலகத்தை இடமாற்றம் செய்ய அரசு தரப்பில்
கூறப்பட்ட காரணங்கள் என்ன?