மேற்கிந்திய தீவுகள் அணிகளுக்கு எதிரான 4வது ஒருநாள் போட்டியில் முதலில் பேட்டிங் செய்த இந்தியா 418 ரன்களை எடுத்து ஒருநாள் போட்டிகளில் அதிகபட்ச ரன்களை எடுத்த அணியாக சாதனை படைத்தது. கேப்டனாக களமிறங்கிய ஷேவாக் ஒருநாள் அரங்கில் 200 ரன்களை கடந்த 2வது வீரர் மற்றும் ஒருநாள் போட்டிகளில் அதிகபட்ச ரன்களை எடுத்த வீரர் என்ற சாதனைகளை படைத்தார். அவருக்கு துணையாக விளையாடிய கம்பிர், ரெய்னா ஆகியோர் அரைசதம் கடந்தனர்.

இந்தியாவுக்கு சுற்றுப்பயணம் வந்துள்ள மேற்கிந்திய தீவுகள் அணி ஒருநாள் தொடரில் விளையாடி வருகிறது. 2 அணிகளுக்கு இடையிலான 4 ஒருநாள் போட்டி இன்று இந்தூரில் நடந்து வருகின்றது. போட்டியின் 'டாஸ்' வென்ற இந்திய அணி முதலில் பேட்டிங் செய்ய தீர்மானித்தது.

துவக்க ஆட்டகாரர்களாக களமிறங்கிய கேப்டன் ஷேவாக் - கம்பிர் ஜோடி துவக்கம் முதலில் இருந்தே அதிரடியாக ரன்களை சேர்த்தனர். இந்திய கேப்டனாக இருந்து ஒரு அரைசதம் கூட அடிக்காதவர் என்ற குற்றச்சாட்டால் தவித்து வந்த ஷேவாக் இன்று அதிரடியாக ஆடி 67 பந்துகளில் சதமடித்தார்.

ஷேவாக் உடன் அடி வந்த கம்பிர் 67 ரன்களில் ரன் அவுட்டாகினார். பின்னர் ஷேவாக் உடன் இணைந்த ரெய்னா அரைசதம் கடந்து, 55 ரன்களில் ரன் அவுட்டாகினார். இந்தியா 341 ரன்களை கடந்த நிலையில் ஜடேஜா(10) ராம்பாலிடம் கேட்ச் கொடுத்தார்.

தொடர்ந்து அதிரடியாக ஆடி வந்த ஷேவாக் ஒருநாள் போட்டிகளில் தனது இரட்டை சதத்தை பூர்த்தி செய்தார். இதன்மூலம் இந்திய வீரர் சச்சினின் 200* ரன்கள் சாதனையை முறியடித்தார். ஷேவாக்கின் சாதனையை இந்திய அணி வீரர்களும், மேற்கிந்திய தீவுகள் அணி வீரர்களும் பாராட்டினர். மேலும் மைதானத்தில் பார்வையாளர்கள் பகுதியில் இருந்த அனைவரும் எழுந்து நின்று கைதட்டி பாராட்டினர்.

149 பந்துகளை சந்தித்த ஷேவாக் 7 சிக்சர்கள், 25 பவுண்டரிகள் அடித்து 219 ரன்கள் எடுத்த போது, போல்லாட் பந்தில் கேட்ச் கொடுத்து வெளியேறினார். 27 ரன்களை எடுத்த ரோஹித் சர்மா போல்டானார். கடைசி நேரத்தில் அதிரடியாக 3 பவுண்டரிகளை அடித்த கோஹ்லி 27 ரன்களுடனும், பார்த்தீவ் பட்டேல் 3 ரன்களுடன் கடைசி வரை அவுட்டாகாமல் இருந்தனர்.

50 ஓவர்கள் முடிவில் இந்தியா 5 விக்கெட்களை இழந்து 418 ரன்கள் எடுத்தது. மேற்கிந்திய தீவுகள் அணி தரப்பில் பந்துவீசிய அனைத்து பந்துவீச்சாளர்களை ஷேவாக் அடித்து விளாசியது குறிப்பிடத்தக்கது.