சரத் பொன்சேகாவைப் பொது மன்னிப்பின் அடிப்படையில்
விடுதலை செய்தது போல சிறைகளில் வருடக்கணக்காக வாடும் எமது பிள்ளைகளையும்
மன்னித்து உடனடியாக விடுவியுங்கள். இவ்வாறு சிறைகளில் வாடும் அரசியல்
கைதிகளின் பெற்றோர் உருக்கமான வேண்டுகோள் விடுத்துள்ளனர்.
பொன்சேகா குடும்பத்துடன் இணைந்தது போல நாங்களும்
எங்கள் பிள்ளைகளுடன் இணைந்து வாழ ஆசைப்படுகிறோம். அந்த ஆசையை
நிறைவேற்றுங்கள். அதுவே நீங்கள் எங்களுக்குச் செய்யும் மிகப் பெரிய உதவியாக
இருக்கும். எனவும் கோரியுள்ளனர்.

வவுனியாவில் இன்று நடைபெறும் சத்தியாக்கிரகப் போராட்டத்துக்கு
புறப்படுவதற்கு முன்னர் யாழ்ப்பாணம், கிளிநொச்சி, மன்னார், முல்லைத்தீவு,
வவுனியா, மட்டக்களப்பு மாவட்டங்களைச் சேர்ந்த கைதிகளின் பெற்றோர்
மேற்கண்டவாறு செய்தியாளரிடம் தெரிவித்தனர்.

புலிகளின் முன்னாள் உறுப்பினர்களான கருணா, பிள்ளையான், கே.பி. ஆகியோர்
அரசுடன் இணைந்து சுகபோகங்களை அனுபவித்துக்கொண்டிருக்கிறார்கள். கடைசி வரை
களத்தில் நின்ற பல விடுதலைப் போராளிகள் விடுவிக்கப்பட்டு விட்டார்கள்.

கிளிநொச்சியைச் சேர்ந்த தாய் ஒருவர்.

எனது பிள்ளைக்கு இதுவரை விடுதலை கிடைக்கவில்லை. இது எந்த வகையில்
நியாயமானது. எனது மகன் சிறையில் பத்து வருடங்களைக் கழித்து விட்டான்.
அவனை பொது மன்னிப்பு அடிப்படையில் விடுவித்து என்னுடன் சேர்ந்து வாழ வழி செய்யுங்கள்' என்றார்.

வலிகாமம் பகுதியைச் சேர்ந்த இளம் குடும்பத் தலைவி ஒருவர்

கணவர் இல்லாமையால் கடந்த 6 வருடங்களாக எமது குடும்பம் பெரிதும்
துன்பப்படுகிறது. எனது இரு பிள்ளைகளுடன் நான் பல கஷ்டங்களை எதிர்கொண்டு
வருகிறேன். அவர்களை படிப்பிக்க முடியாத நிலை கூட ஏற்பட்டுள்ளது. என்னால்
எதுவும் செய்ய முடியவில்லை. பொருளாதாரச் சுமை, வருமானமின்மை காரணமாக
நொந்துபோயுள்ளேன். இனியாவது எனது கணவரை விடுவித்து உதவுங்கள் என்று
கண்ணீருடன் கருத்து வெளியிட்டுள்ளார்.

மட்டக்களப்பைச் சேர்ந்த குடும்பத்தலைவி ஒருவர்

அவரைக் கைது செய்து 9 வருடங்கள் ஆகிவிட்டது. விடுவார்கள் என்று
எதிர்பார்த்திருந்து களைத்துப் போய் விட்டேன். இந்த முறையாவது ஒரு நல்ல
முடிவு கிடைக்க வேண்டும் என மனதில் வேண்டிக்கொண்டு இந்தச் சத்தியாக்கிரகப்
போராட்டத்துக்குச் செல்கிறேன் என்றார்.

இவ்வாறு ஏனைய மாவட்டங்களில் இருந்தும் சத்தியாக்கிரகப் போராட்டத்தில்
பங்கேற்ற வவுனியா வந்துள்ள பெற்றோர்கள் தமது கோரிக்கைகளை கண்ணீருடன் முன்
வைத்தனர்.

இதேவேளை, அரசியல் கைதிகளை விடுதலை செய்யுமாறு கோரி இன்று வவுனியாவில் மாபெரும் சத்தியாக்கிரகப் போராட்டம் இடம்பெறவுள்ளது.

தமிழ்த் தேசியக் கூட்டமைப்பின் ஏற்பாட்டில் வவுனியா நகரசபை மைதானத்தில்
இந்தக் கவனயீர்ப்புச் சத்தியாக்கிரகம் காலை 7 மணி முதல் நடத்தப்படவுள்ளது.

இப் போராட்டத்தில், சிறைகளில் வாடும் அரசியல் கைதிகளின் உறவினர்கள்
உட்பட ஆயிரக்கணக்கான மக்கள் பங்கேற்பார்கள் என்று எதிர்பார்க்கப்படுகிறது.

தம்மை விடுவிக்குமாறு கேட்டு தமிழ் அரசியல் கைதிகள் சிறைகளில் பட்டினிப்
போராட்டம் நடத்தி வருகையில், அவர்களுக்கு ஆதரவு தெரிவித்தும்
நிபந்தனையின்றி அவர்களை உடனடியாக விடுதலை செய்ய வலியுறுத்தியும் இந்தச்
சத்தியாக்கிரக போராட்டம் ஏற்பாடு செய்யப்பட்டுள்ளது.

இதேவேளை, இராணுவத்தின் முன்னாள் தளபதி சரத் பொன்சேகா ஜனாதிபதியின் பொது
மன்னிப்பின் கீழ் விடுதலை செய்யப்பட்டதைத் தொடர்ந்து தமிழ் அரசியல்
கைதிகளின் விடுதலை தொடர்பிலும் அழுத்தங்கள் அதிகரித்துள்ளமை
குறிப்பிடத்தக்கது.