கவிஞர் வாலி பற்றி.... (பதில்கள் - பேராசிரியர் கு. ஞானசம்பந்தன்)

by **அ.இராமநாதன்** Fri Jul 20, 2012 9:25 am

வே. செல்வகணேசன், தூத்துக்குடி:

கவிஞர் வாலி இதுவரை எத்தனைப் பாடல்கள்
இயற்றியுள்ளார்? அவரைப் பற்றி சில வார்த்தைகள்...

திரையுலகில் எம்.ஜி.ஆர். சிவாஜி காலம்தொடங்கி சிம்பு,
தனுஷ் காலம் வரையிலான ஐந்து தலைமுறைக்குக் கவிதை
எழுதிக் கொண்டிருக்கும் திரையுலகக் கவிச்சக்கரவர்த்தி
கவிஞர் வாலி.

பத்தாயிரத்திற்கும் மேற்பட்ட பாடல்கள் இயற்றியுள்ள
கவிஞர் வாலி அவர்கள், கதை வசனம், நாடகங்கள்,
நடிப்பு, பத்திரிகையாளர், ஓவியம் எனப் பன்முகத்
தன்மைகொண்ட கவிவேந்தர்.

வார்த்தை விளையாட்டு கவிஞருக்குக் கைவந்த கலை.
சான்றாக, அழகிய தமிழ் மகன் படத்தில் வரும் எல்லாப்
புகழும் இறைவன் ஒருவனுக்கே என்ற பாடலில்

எந்த வேர்வைக்கும் வெற்றிகள் வேர் வைக்குமே
உன்னை உள்ளத்தில் ஊர் வைக்குமே
என்றும்,

இராமகாதையைப் புதுக்கவிதை வடிவில் அவதார புருஷன்
என்ற பெயரில் அவர் படைக்கின்றபோது,

இராவணன் அனுமனின் வாலில் தீவைத்தான்.
அனுமன் எரித்ததோ இலங்கைத் தீவைத்தான்.
என்றும்,
அவர் எழுதிய வரிகள் படிக்குந்தோறும் இனிமை பயப்பன.

கற்பனை என்றாலும் கற்சிலை என்றாலும்
கந்தனே உனை மறவேன்
எனும் பக்தி பாடலாலும்,

மாதவிப் பொன்மயிலாள் தோகை விரித்தாள்
எனும் நாட்டியப்பாடலாலும்,

இருந்தாலும் மறைந்தாலும் பேர் சொல்ல வேண்டும்
இவர்போல யாரென்று ஊர் சொல்ல வேண்டும்

எனும் சமுதாய சிந்தனைப் பாடலாலும் “இவர் போல எழுத
வல்லார் எவரோ’ என இன்றைக்கும் வாலியின் பாட்டுக்
கொடி தமிழ்த்திரையுலகில் பட்டொளி வீசிப் பறந்து
கொண்டுதான் இருக்கிறது.
-
=================================================