அனக்கொண்டா - ருத்ரா

by **கவியருவி ம. ரமேஷ்** Tue Jun 25, 2013 11:51 am

அனக்கொண்டா.
==================================================ருத்ரா

அந்த ஆறு எப்போதும்
ஓடிக்கொண்டே இருக்கிறது.
இதன் கங்கோத்ரி எங்கிருக்கிறது.
இரவு கதவுகளை அடைக்க வந்தபோது
இந்த ஆறு தலையை சிலுப்பிக்கொண்டு
வந்து கட்டிப்பிடிக்கிறது.
நீருக்குள் நீரே முட்டையிடும்
அதிசயமாய்
வாழ்க்கையின் அந்துப்பூச்சிகளும்
வர்க்கம் பெருக்கிக்கொள்கின்றன.
பகலில் நீண்டு நெளிந்து
அனகொண்டாவைப்போல்
முறுக்கிப்பிழிந்து விழுங்குகிறது.
இதன் முதுகு கருப்பு இளகும்
தார் பளிங்கில் செதுக்கியிருந்தாலும்
அது சூரிய மழையில்
மின்னுகிறது.
தலைகளின் அலைகள்..
டப்பா டப்பாக்களாய்
மிதந்து ஓடுகின்றன.
டயர்களின் வயிறுகளில் வழுக்கி ஓடுகிறது.
பாறை எண்ணெய் குடித்து
பறக்கும் குதிரைகளின் ஆறுகள்.
வயிற்றுக்குள் தீ யெரிந்து
அதன் வெப்பக்குழம்பு
பிசைந்து பிதுக்கும் பிஸ்டன்களில்
மைல்கள் நசுக்கப்படுகின்றன.
வேகம் எனும் அசுரக்குழந்தை
ஆற்றின் கர்ப்பப்பைக்குள்
நீளமாய் சுரங்கம் வெட்டுகிறது.
இந்த தண்ணீர்ப்பிழம்பின்
நீள வழிக்குள் நீளக்கனவுகள்.
இரைச்சல்களின் வெள்ளம்.
உடல்தாங்கிய உருவங்களில்
கடல் தங்கி கலக்கினாற்போல்
கொந்தளிக்கும் ஆசைகளை
பஃறுளி ஆறுபோல்
பாய்ந்தோடுகின்றன.
இந்த ஆறுகள் கடலில் கலப்பதில்லை.
அங்கங்கே ஒரு கொட்டங்கச்சிக்குள்
அடங்குகுன்றன.
அவை வில்லாக்கள்
அவை பங்களாக்கள்
கட்டைகுத்திய மெட்ராஸ் சீலிங்க் வீடுகள்.
பிய்ந்த கோழிச்சிறகுகளைப்போல்
கூரைக்கட்டிக்கொணட ரோட்டோரத்து
குடிருப்புகளாகவும் இருக்கலாம்
இங்கே ஆறு பிரிந்து
வாழ்க்கையின் அழுத்தத்தில்
கூன்முதுகு "போன்ஸாய்"களின்
கிளைக்குச்சிகளாய்
நடுங்கும் இலைகளாய்
கசக்கப்படும் உயிரும் ஆன்மாவும்
சுருட்டி எறியப்படுவனவாய்
இற்று விழுன் படுக்கைகளுக்குள் சங்கம்.
மீண்டும் காலைநேரம் கழுத்தைப்பிடிக்கும்
வெறியுடன்
போட்டா போட்டியைத்தொடங்குகிறது.
அண்ணா சாலையானால் என்ன‌
அமிஞ்சிக்கரை ரோடானல் என்ன‌
அதோ ஆறு ஓடத்தொடங்குமிறது.
மனித ஈசல்கள்
டீசல் பூச்சிகளாய்
வழியை நிரப்பி மூச்சு முட்ட‌ ஓடுகிறது.
பச்சையும் சிவப்புமாய்
சிக்னல் காட்டும்
ஒளி முறைப்புகளில்
இந்த ஆறு
தன் வாலையே கவ்விக்கொள்ளும்
நாயைப்போல் உட்கார்ந்து உட்கார்ந்து ஓடுகிறது.
அந்தி கவிந்த வேளையில்
இந்த ஆறு
டிராகன் பூதம் போல்
முன்னே மஞ்சள் கண்ணிலும்
பின்னே சிவப்புக்கண்ணிலும்
எரியவிட்டுக்கொண்டு
ஓடுகின்றன.

"அடே அப்பா
இந்த கம்பி கிராதியையே புடிச்சுகிட்டு
எவ்வளவு நேரம் தான் நிப்பே.
"ரோடு ஓடுகிறதா
கார் ஓடுகிறா"
உன் பின் ந‌வீனத்துவ‌
பிழிசல்களை
பேப்பரில் பொட்டலம் போட்டுக்கோ.
இப்ப வா.
சாப்ட போலாம்."

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

அனக்கொண்டா - ருத்ரா

அனக்கொண்டா - ருத்ரா

Re: அனக்கொண்டா - ருத்ரா