நெல்லிக்கனி!

by **அ.இராமநாதன்** Sun Aug 04, 2013 10:52 pm

* துயரங்களைச்
சொல்லும் கவிதைகளும்,
கதைகளும், பாடல்களும்
இன்பம் தரக்கூடியவை தான்!
-
* மகிழ்ச்சித் தேனைவிட
துன்பக் கசப்பு
நெல்லிக்கனி போல
முன் கசந்து
பின் இனிக்கும்!
-
* எப்பொழுதும் – நாம்
இன்பங்களுக்காக
இளகியிருக்க வேண்டும்…
விதி வழி சென்று
விதிகளை வென்று
நிமிர்ந்திருக்க வேண்டும்!
-
* துன்பங்களுக்கு அப்படியில்லை…
நம் சோம்பலே அதற்கு
சோறு போடும்…
சினங்களே அதற்கு
சிங்கார மூட்டும் – இன்னும்
இயலாதவை அனைத்தும்
துன்பத்திற்குத் தூது போகும்!
-
* வாழ்க்கைப் பாடங்களுக்காக
என்றும் துன்பங்களைத்
தோளில் சுமக்க முயல்வதெதற்கு?
-
* எத்துன்பம் நம்மைத் தீண்டிடினும்
விவேகம் – நம்
விதியையும் வெல்லுமே!
-
* பறிக்கப்பட்டு – ஒழுங்கின்றிக்
கூடையில் அழுத்தப்பட்டு
மொத்தமாய் – விற்கப்பட்டு
நார்களால் கால்கள்
இறுக்கிக் கட்டப்பட்டு
தலைகீழாகத் தொங்கவிட்டாலும்
மணமுடன் மலர்ந்து
சிரிப்பதில்லையா மலர்கள்…
-
* எப்பொழுதும் நிமிர்ந்து நிற்கும்
நமக்கென்ன பயம்?
-
* பரந்து கிடக்கிறதுஇங்கு சொர்க்கம்…
கட்டுப்பாடுகளற்று எங்கும்
விரிந்து மலர்ந்திருக்கிறது
இந்த பூமி…
முயன்றால்
முடியாதவற்றிற்கும்
முடிவுரைகளால்
முற்றுப்புள்ளி
வைக்கலாம்!
-
===================
— செல்லம் ரகு, திருப்பூர்.
நன்றி: வாரமலர்