மதுவைத் தடை செய்வோம்

by **karumalaithamizhazhan** Thu Oct 16, 2014 5:13 pm

   மதுவைத் தடைசெய்வோம்
       பாவலர் கருமலைத்தமிழாழன்

பூந்தேறல்   எனச்சொல்லி   புதுமை   என்றே
            பூரித்துச்   சுவைத்திடுவர்!   புத்து   ணர்வு
ஏந்திழையாள்    இன்பம்போல்   உள்ள   தென்று
            ஏதேதோ   உளறிடுவர்;   மீண்டும்   மீண்டும்
மாந்திடுவர்   மனம்மயங்கும்   மகிழ்வில்   துய்த்தே
            மறைந்ததுவே   துயரென்று   மறப்பார்    தம்மை !
ஏந்திடுவர்   கோப்பையினை    எந்த   நேரம்
            எல்லாமும்   அதுவென்றே    வாழ்வி   ழப்பர் !

பழக்கந்தான்   படிப்படியாய்த்   தேவை   யென்னும்
            பாழ்நிலைக்குத்    தள்ளிவிட    நாளும்   நாளும்
வழக்கமான   மதுவுக்கோ    அடிமை   யாகி
            வளர்வொழுக்கம்   பண்பாடு   எல்லாம்    போக
நிழலான   வாழ்க்கையிலே   நோயும்    முற்றி
            நிரந்தரமாய்க்    கண்மூட;   உலகம்   தன்னில்
அழகான    பெயர்சொல்லச்    சுவடு   மின்றி
            அழிவதுதான்   பிறவிக்கு   நன்றா   சொல்வீர் !

குடுப்பத்தை    வறுமைக்குத்    தள்ளி விட்டுக்
            குழந்தைக்குப்   பட்டினியில்    பெயரைச் சூட்டி
நடுத்தெருவில்    நற்பெயரை   இழக்கச்   செய்யும்
            நன்மையிலா   குடியிதனால்   பயன்தான்    உண்டோ ?
கொடுக்கிறது   வருவாய்தான்   என்றே   ஆட்சி
            கொடுமைக்கு   வழிவகுத்தல்   நியாயந்    தானா ?
தடுத்திடுவோம்   மதுபழக்கம் ! மதுவை   யிங்கே
            தடைசெய்வோம் !   உழைப்பாலே    உயர்வோம்    நாமே !

அருமையான கவிதை

சொந்த கவிதை பகுதிக்கு மாற்றப்பட்டுள்ளது

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

மதுவைத் தடை செய்வோம்

மதுவைத் தடை செய்வோம்

Re: மதுவைத் தடை செய்வோம்