சமயோசிதம்!
அரேபிய குதிரை வணிகன் ஒருவன் மாசிடோனிய மன்னர் பிலிப் என்பவரிடம் தனது குதிரையை விற்பதற்காகக் கொண்டு வந்தான். தளபதிகளிடம், "'உங்களில் யாராவது ஒருவர் இந்தக் குதிரையை அடக்க முடியுமா?'' என்று கேட்டார் மன்னர்.
 எவருக்கும் அடங்காமல் தறிகெட்டு ஓடியது அந்தக் குதிரை. எல்லோருக்கும் அதன் அருகில் நெருங்குவதற்குக்கூட அச்சமாக இருந்தது.
 வேடிக்கை பார்த்துக் கொண்டிருந்த மன்னரின் மகன், தனது தந்தையை நோக்கி, ""நீங்கள் அனுமதித்தால் இந்தக் குதிரையை நான் அடக்கிக் காட்டுகிறேன்'' என்றான்.
 மன்னரும் அனுமதியளிக்க, சிறிது நேரத்தில் அந்தக் குதிரை அவனிடம் அடங்கிப் போனது.
 குதிரை அதனுடைய நிழலைப் பார்த்து, மிரண்டு ஓடியதை அந்த இளவரசன் கவனித்துவிட்டான். அதனால் சூரியன் இருக்கும் திசையை நோக்கி, குதிரையை அவன் செலுத்தியதால், பின்னால் விழும் நிழல் குதிரைக்குத் தெரியவில்லை. அதனாலேயே குதிரை கட்டுக்குள் அடங்கியது.
 அனைவரையும் ஆச்சரியத்தில் மூழ்கியடித்த அந்த இளவரசன்தான் மாவீரன் அலெக்ஸôண்டர்.
-சு.இலக்குமண சுவாமி, மதுரை.
dinamani
-
மானம்!
 ஒரு சமயம் மகாகவி பாரதியார், வெளியில் சென்றுவிட்டு தன் வீட்டுக்குத் திரும்பி வந்தபோது, அவரது வீட்டின் முன்பு குடுகுடுப்பைக்காரன் ஒருவன் நின்று கொண்டு "பழைய துணி இருந்தா போடுங்க சாமி..' என்று கேட்டுக் கொண்டிருந்தான்.
 சற்றும் தாமதியாத பாரதியார் தன் இடுப்பு வேட்டியைக் கழற்றி அவனிடம் கொடுத்தார். கோவணத்துடன் நின்று கொண்டிருந்த பாரதியைப் பார்த்த அவரின் மனைவி கோபத்தில் வீட்டுக்கதவை அடைத்துவிட்டார்.
 உடனே பாரதி, ""செல்லம்மா என்ன இது? உடனே கதவைத் திற...'' என்றார்.
 அதற்கு செல்லம்மா, ""உங்களால அக்கம்பக்கத்துல என் மானம் போகுது'' என்று வீட்டுக்குள்ளிருந்தபடியே குரல் கொடுத்தார்.
  அதற்கு பாரதி, ""அய்யோ செல்லம்மா, இப்போது உன் மானத்தோடு என் மானமும் சேர்ந்து போய்க் கொண்டிருக்கிறது. சீக்கிரம் கதவைத் திற'' என்று அவசரப்படுத்தினார். இதைக் கேட்டதும் கோபத்தில் இருந்த செல்லம்மா, கொல்லென்று சிரித்து விட்டார். உடனே வந்து கதவைத் திறந்தார்.
-ம.உலகநாதன், உடன்குடி.
dinamani
-
சிரிப்பு!
விஞ்ஞானி ஆல்பர்ட் ஐன்ஸ்டீனுக்கு நன்றாக வயலின் வாசிக்கத் தெரியும்.
 ஓய்வு நேரத்தில் வயலின் வாசிப்பது அவரது வழக்கம்.
 அப்படி ஒருநாள் தன்னை மறந்து வயலின் வாசித்துக் கொண்டிருந்தபோது அவருடைய நண்பரும் ஹங்கேரி நாட்டின் பிரபல நகைச்சுவை நடிகருமான மால்நார் ஐன்ஸ்டீனைப் பார்க்க வந்தார்.
 அவருக்கு ஐன்ஸ்டீன் வயலின் வாசிப்பதைப் பார்த்து ஆச்சரியமாகப் போய்விட்டது.
 இந்த மனிதரால் வயலின் வாசிக்க முடியுமா என்று எண்ணியிருப்பார் போலும். ஆகவே, வயலின் வாசிக்கும் ஐன்ஸ்டீனைப் பார்த்துச் சிரிக்க ஆரம்பித்துவிட்டார்.
 அதைக் கவனித்த ஐன்ஸ்டீன், ""நான் வயலின் வாசிப்பதைப் பார்த்து, நீங்கள் ஏன் சிரிக்கிறீர்கள்? என்றாவது நீங்கள் நகைச்சுவை வேடத்தில் நடிக்கும்போது அதைப் பார்த்து நான் சிரித்திருக்கிறேனா?'' என்று அமைதியாகக் கேட்டார். அந்த நகைச்சுவை நடிகர் வாயடைத்துப் போனார்.
-நா.பிரியதர்ஷிணி, 9-ஆம் வகுப்பு, செஞ்சி.
dinamani
-

தொடருங்கள்