பட்டு ரோஜா மலர்ந்தது; கிட்டப் போனால் சுட்டது.- விடுகதைகள்

by **அ.இராமநாதன்** Fri Sep 14, 2018 1:54 pm

91. ஆகாயத்திலிருக்கும் அற்புத மனிதன்
      ஆற்றிலும் விழுவான்; குளத்திலும் விழுவான்;
      ஆனாலும், நனையமாட்டான்.

92. வெட்ட வெட்டத் தழைக்கும் பட்டணத்து வேம்பு - அது என்ன?

93. சூரியன் காணாத கங்கை;
      சுண்ணம் தோற்கும் வெள்ளை;
      மண்ணிற் பண்ணாத பாண்டம்.

94. பறிக்கப் பறிக்க பெரிதாகும்
      அது என்ன?

95. வட்ட வட்டச் சிமிழில்
      இட்டதெல்லாம் குட்டிப் பாம்பு.

96. தேய்க்கத் தேய்க்க துரைக்கும்
      அடிக்க அடிக்க வெளுக்கும்.

97. எட்டாத கொம்பில் மிட்டாய்ப் பொட்டலம்.

98. மொட்டை மாடு உட்கார்ந்திருக்குது;
      மூக்கணாங்கயிறு மேய்ந்து வருகுது.

99. வராதிருந்து வந்தேன்;
      வந்துவிட்டுப் போனேன்;
      போன பிறகு வந்தேன்;
      இனிப் போனால் வரமாட்டேன்.
      நான் யார்?

100. பிளந்த நாக்குடையவனாம்; பாம்புமல்ல
        பேசாமல் பேசுபவன்; ஞானியல்ல.

101. விழித்திருக்கும் போதே அடித்துக் கொண்டிருப்பான்.

102. சின்னச் சின்னச் சாத்தான்,
        வயிறு பெருத்துச் செத்தான்.

103. ஊரெல்லாம் மூடியிருக்கும் - ஆனால்
        ஊறுகாய்ப் பானை திறந்தே இருக்கும்.
104. மேலே பறக்கும் வால் நீண்ட குதிரைக்குத்
        தரையிலே இருக்கும் தம்பி கையில் கடிவாளம்.

105. ஒன்றும் இரண்டும் கலப்பு:
        உள்ளங்கையால் பிடிப்பு;
        ஆவியிலே நடப்பு:
        ஆண்டவனுக்குப் படைப்பு.

106. குண்டோதரன் வயிற்றிலே,
        குள்ளன் நுழைகிறான்.

107. இறந்த மாட்டை
        அலற அலற அடிக்கிறார்கள்.

108. எத்தனை பேர் ஏறினாலும் சலிக்காத குதிரை.

109. வட்ட முகம் உண்டு, வாய் திறந்து பேசாது.
        காட்டக் கை உண்டு, காலூன்றி நடக்காது.

110. வட்ட வட்டச் சிங்கண்ணா,
        வாயில்லாத சிங்கண்ணா,
        எலும்பில்லாத சிங்கண்ணா,
        என்னை வந்து எழுப்பண்ணா.

111. முற்றத்தில் நடப்பாள்;
        மூலையில் கிடப்பாள்.

112. தொட்டால் சுருங்கி - அதற்குத்
        தொண்ணுறு கால்.

113. ஊருக்கெல்லாம் ஒரே கூரை - அது என்ன?

114. அரக்கன் தலை - அதோ
        அந்தரத்தில் தொங்குது.

115. சாத்தின. கதவு இருக்க,
        ஏத்தின விளக்கு இருக்க,
        இராத்திரி வந்தது யார்?
        இசையோடு எழுப்பியது யார்?

116. வாயில் பற்கள் உண்டு; கடிக்காது,
        தலையைப் பிராண்டும்; வலிக்காது,
        அழுக்கை அகற்றும்; பூச்சியைப் பிடிக்கும்.
        அது என்ன?

117. அடித்தால் அழுவான்; பிட்டால் சிரிப்பான்.

118. இரண்டு வீட்டுக்கு ஒரே உத்தரம்.

119. பட்டு ரோஜா மலர்ந்தது;
        கிட்டப் போனால் சுட்டது.

120. தட்டுப் போல் இருக்கும் - அதில்
        சொட்டுத் தண்ணிர் ஒட்டாது.
-
----------------

விடைகள்
----

91. சூரியன்.

92. தலைமுடி.

93. தேங்காய்.

94. குழி.

95. இடியாப்பம்.

96. சோப்பு.

97. தேன் கூடு.

98. பூசணிக்காயும் அதன் கொடியும்.

99. பல்.

100. பேனா

101. கண் இமை.

102. பருத்தி.

103. கிணறு.

104. பட்டம்.

105. கொழுக்கட்டை. 106. சாவி.

107. மத்தளம்.

108. திண்ணை,

109. கடிகாரம்.

110. மூட்டைப் பூச்சி.

111. துடைப்பம்.

112. மரவட்டை.

113. வானம்.

114. திருஷ்டிப் பூசணிக்காய்.

115. கொசு. . 116. சீப்பு.

117. தேங்காய்.

118. மூக்கு.

119. நெருப்பு.

120. தாமரை இலை.

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

பட்டு ரோஜா மலர்ந்தது; கிட்டப் போனால் சுட்டது.- விடுகதைகள்

பட்டு ரோஜா மலர்ந்தது; கிட்டப் போனால் சுட்டது.- விடுகதைகள்