புகழ் பெற்றவர்கள் வாழ்வில் நடந்த சுவையான சம்பவங்கள்

by **அ.இராமநாதன்** Tue Mar 31, 2020 8:59 pm

நாட்டுப் பற்று!

நம் நாட்டு விடுதலைக்காகப் பாடுபட்ட பகத்சிங் பற்றி உங்களுக்குத் தெரியும். ஆங்கிலேயரை எதிர்த்துப் போராடியதால் அவருக்குத் தூக்குத் தண்டனை விதிக்கப்பட்டது.

தூக்கிலிடுவதற்கு முன் ஏதாவது சொல்ல விரும்பினால் சொல்லலாம் என்று அவருக்கு அனுமதி கொடுத்தது ஆங்கிலேய அரசு.

தாம் இறப்பது பற்றி பகத்சிங் வருந்தவில்லை. ஆனால், தன்னை ஒரு குற்றவாளியாக நினைத்துத் தூக்கில் போடுவதை அவர் விரும்பவில்லை.

அதற்குப் பதிலாகத் தன்னை ஒரு எதிரியாகக் கருதிச் சுட்டுக் கொல்லவேண்டும் என்று தன்னுடைய இறுதி விருப்பத்தைத் தெரிவித்தார்.

""நீ எப்படியும் இறக்கத்தான் போகிறாய்... உன்னை எப்படிக் கொன்றால் என்ன?'' என்று அலட்சியமாகக் கேட்டனர் ஆங்கிலேய அதிகாரிகள்.

அதற்கு பகத்சிங், ""தூக்கிலிடும்போது, என் கால்கள் என்னுடைய தாய்மண்ணைத் தொடமுடியாத உயரத்தில் இருக்கும். ஆனால் துப்பாக்கியில் சுடும்போது என்னுடைய தாய்மண்ணைத் தழுவியபடியே உயிர்விடுவேன். அதுதான் எனக்குப் பெருமை!'' என்று கூறினாராம்.

-மு.சஹானா மர்லியா, கோயம்புத்தூர்.
dinamani

by **அ.இராமநாதன்** Tue Mar 31, 2020 9:00 pm

அறிவுத் தாகம்!

1740-ஆம் ஆண்டில் அமெரிக்காவில் ஒரேயொரு புத்தகக் கடைதான் இருந்ததாம். இங்கிலாந்திலிருந்துதான் அங்கு புத்தகங்கள் வந்து கொண்டிருந்தன. நூலகம் என்றால் என்ன என்றே அறியாத காலம்! பலரும் சென்று படிப்பதற்கான ஒரு அமைப்பு இருந்தால் எவ்வளவு பயன்படும் என்ற எண்ணம் ஒரு சிறுவன் மனத்தில் தோன்றியது.

அவனும் அவனது நண்பர்கள் சிலரும் சேர்ந்து ஒரு சிறிய அறையில் ஒரு பொது நூலகத்தைத் துவக்கினார்கள். வாசகர்களிடம் சந்தா வசூலித்து, இரண்டே ஆண்டுகளில் பெரிய நூலகமாக அது உருவானது. அமெரிக்காவில் அமைக்கப்பட்ட முதல் பொது நூலகம் இதுதான் என்கிறார்கள். அதன்பின் இத்தகைய நூலகங்கள் நாடெங்கும் ஏற்படுத்தப்பட்டன.

நூலகம் தோன்றக் காரணமாக இருந்த அந்தச் சிறுவன்தான் பின்னாளில் உலகப் புகழ்பெற்ற அறிஞராகத் திகழ்ந்த பெஞ்சமின் ஃப்ராங்க்ளின்.

-ஆச்சா, செவல்குளம்.
dinamani

by **அ.இராமநாதன்** Tue Mar 31, 2020 9:00 pm

முதல் கடமை!

கொல்கத்தாவில் (அப்போது கல்கத்தா) பிளேக் நோய் பரவி, ஆயிரக்கணக்கான மக்கள் இறந்துகொண்டிருந்தார்கள். விவேகானந்தரும் அவரது சீடர்களும் நோயாளிகளைத் தேடி, ஓடி ஓடி சிகிச்சை செய்து, சேவை செய்து கொண்டிருந்தனர்.

ஒரு சீடர் கவலையுடன் விவேகானந்தரிடம், ""சுவாமி, இந்தத் தொண்டுக்குப் பணம் நிறையச் செலவாகும். நம்மிடம் இருக்கும் பணம் போதாது. பணம் இல்லாமல் இவ்வளவு பெரிய காரியம் எப்படி நடைபெறும்?'' என்று கேட்டார்.

உடனே விவேகானந்தர், ""பணம் தேவைப்பட்டால், பேலூர் மடத்தை விற்று விடுவோம். இந்த சேவைதான் நமது முதல் கடமை! ஊரில் நூற்றுக்கணக்கானவர்கள் மடிந்து விழும்போது, மடத்தில் கைகட்டிக் கொண்டு உட்கார்ந்திருக்க என்னால் முடியாது...'' என்றார்.

-இ.ராஜு நரசிம்மலு, சென்னை.
dinamani

by **அ.இராமநாதன்** Tue Mar 31, 2020 9:01 pm

சிக்கனம்!

ஒருமுறை தந்தை பெரியார் கோவையிலிருந்து ஈரோடு வருவதற்காக ஜி.டி.நாயுடு, பெரியாருக்கு முதல் வகுப்பில் ரயிலில் செல்ல டிக்கெட் வாங்கிக் கொடுத்துவிட்டு, அவரும் அதே ரயிலில் வேறு ஒரு பெட்டியில் பயணம் செய்து வந்தார்.

அடுத்த ஸ்டேஷன் வந்ததும், ஜி.டி.நாயுடு, பெரியாரை முதல் வகுப்புப் பெட்டியில் தேடினார். அங்கு அவரைக் காணாமல் அடுத்தடுத்த பெட்டிகளில் தேட ஆரம்பித்தார்.தேடிக் கொண்டு வருகையில், மூன்றாவது வகுப்பு பெட்டியில் பெரியார் இருப்பதைப் பார்த்து, ""ஏன்? முதல் வகுப்பு டிக்கெட்தான் வாங்கிக் கொடுத்தேனே... அதில் வராமல் மூன்றாம் வகுப்பில் பயணம் செய்து வருகிறீர்களே!'' என்று ஆச்சரியப்பட்டார்.

""நாயுடு சார், இந்தப் பெட்டியும் நாம் போக வேண்டிய இடத்துக்குத்தானே போகிறது. எதற்கு வீண் செலவு என்று டிக்கெட் பரிசோதகரிடம் முதல் வகுப்பு டிக்கெட்டை ஒப்படைத்துவிட்டு மூன்றாம் வகுப்பு டிக்கெட்டை வாங்கிக் கொண்டேன்.. மீதிப் பணமும் பெற்றுக் கொண்டேன்! நாமும் சாதாரண மனிதர்கள்தானே சார்...'' என்றார் பெரியார்.

பெரியாரின் சிக்கனத்தைக் கண்டு நாயுடு வியந்து போனார்.

-கலைப்பித்தன், கடலூர்.
dinamani

by **அ.இராமநாதன்** Tue Mar 31, 2020 9:01 pm

இரக்கம்!

1951-ஆம் ஆண்டு தெலுங்கானா பகுதியில் விவசாயத் தொழிலாளர்களுக்கும் முதலாளிகளுக்கும் இடையே பயங்கரமான கலவரம் நடந்து கொண்டிருந்தது.

அப்போது வினோபாஜி தெலுங்கானா பகுதியில் நடைப்பயணம் மேற்கொண்டார். தெலுங்கானா கலவரத்துக்கு அடிப்படைக் காரணம், விவசாயத் தொழிலாளர்களுக்கு நிலம் கிடைக்காததுதான் என்ற உண்மையைக் கண்டார்.

போச்சம்பள்ளி என்ற கிராமத்தில் வினோபாஜி தங்கியிருந்தபோது, பிரார்த்தனைக் கூட்டம் முடிந்ததும், சிலர் அவரைச் சந்தித்து, தாங்கள் விவசாயத் தொழிலை நம்பி வாழ்பவர்கள் என்றும் உழைத்துப் பிழைக்க தங்களுக்கு நிலம் ஏதும் இல்லை என்றும் கூறி வருத்தப்பட்டார்கள்.

வினோபாஜி கூட்டத்தினரை நோக்கி, ""இந்த விவசாயத் தொழிலாளர்களின் தாகம் தீர வழி சொல்லக் கூடியவர்கள் இந்தக் கூட்டத்தில் இருக்கிறீர்களா?'' என்று கேட்டார்.

உடனே, ஒரு நில உரிமையாளர் எழுந்து, ""என்னுடைய நிலங்களில் 100 ஏக்கரை நான் உடனடியாகக் கொடுக்கத் தயார்...'' என்றார்.

அவர் தந்த 100 ஏக்கர் நிலமும் உடனடியாக அந்த விவசாயத் தொழிலாளர்களுக்குப் பிரித்துக் கொடுக்கப்பட்டது.

வினோபாஜியின் மனதில் அப்போது ஏற்பட்ட அந்த இரக்கம்தான் "பூமிதான இயக்கம்' என்று உருவாகி நாடெங்கும் வளர்ந்தது.

-மு.பெரியசாமி, விட்டுக்கட்டி.
dinamani

by **அ.இராமநாதன்** Tue Mar 31, 2020 9:02 pm

பணம்!

இரண்டாம் உலகப் போர் நடந்து கொண்டிருந்த சமயம்.

இங்கிலாந்து பிரதமர் வின்ஸ்டன் சர்ச்சில், வானெலியில் பேசுவதற்கு ஏற்பாடு செய்யப்பட்டிருந்தது.

சரியான நேரத்துக்கு, உதவியாளருடன் வானொலி நிலையத்துக்குப் புறப்பட்டார் சர்ச்சில். அப்போது அவர் செல்ல இருந்த வாகனம் பழதடைந்திருந்தது தெரிய வந்தது. சரியான நேரத்துக்கு வானொலி நிலையம் போய்ச் சேரவேண்டுமே என்ற கவலையில், அந்த வழியே வந்த வாடகைக் கார் ஒன்றைக் கைகாட்டி நிறுத்தினார் சர்ச்சிலின் உதவியாளர்.

டாக்ஸி டிரைவரோ, ""டாக்ஸி வராது சார்... இன்னும் சிறிது நேரத்தில் சர்ச்சில் ரேடியோவில் பேசப் போகிறார். அதைக் கேட்பதற்காக அவசரமாகச் சென்று கொண்டிருக்கிறேன்...'' என்றார்.

சர்ச்சிலுக்கு ரொம்ப சந்தோஷமாகப் போய்விட்டது. அந்த டிரைவருக்கு ஏதேனும் பரிசு கொடுக்க வேண்டுமென்று எண்ணி, தனது பாக்கெட்டிலிருந்து கொஞ்சம் பணத்தை எடுத்து நீட்டினார்.

அதை அவசர அவசரமாக வாங்கித் தனது சட்டைப்பைக்குள் திணித்துக் கொண்ட டிரைவர், ""சீக்கிரம் வண்டியில் ஏறுங்க... சர்ச்சில் பேச்சாவது ஒண்ணாவது, எங்கே போக வேண்டும் என்று சொல்லுங்கள்... அங்கே கொண்டு போய்விடுகிறேன்'' என்றாரே பார்க்கலாம்!

பணம் படுத்தும் பாட்டைப் பார்த்து, சர்ச்சில் மனதுக்குள் சிரித்துக் கொண்டார்.

-முக்கிமலை நஞ்சன்.
dinamani

by **அ.இராமநாதன்** Tue Mar 31, 2020 9:02 pm

தமிழ்

தமிழ்த்தாத்தா உ.வே.சாமிநாதய்யரின் மாணவப் பருவத்தில் நடந்த நிகழ்ச்சி இது.

அவருடைய தாத்தா, ""சாமிநாதா, நீ ஆங்கிலம் படிக்க விரும்புகிறாயா, சமஸ்கிருதம் படிக்க விரும்புகிறாயா?'' என்று கேட்டார்.

அதற்கு சுவாமிநாதர், ""நான் தமிழ் படிக்க விரும்புகிறேன்..'' என்றார்.

தாத்தா உடனே, ""நீ ஆங்கிலம் படித்தால் பூலோகத்தில் பெருமையுடன் வாழலாம். சமஸ்கிருதம் படித்தால் மேலோகத்தில் பெருமையுடன் வாழலாம். இரண்டும் இல்லாமல் தமிழ் படிக்கப் போகிறேன் என்று சொல்கிறாயே?'' என்று கேட்டார்.

சுவாமிநாதரிடமிருந்து உடனடியாக பதில் வந்தது, ""தாத்தா, ஆங்கிலம் படித்தால் பூலோகத்தில் பெருமையுடன் வாழலாம். சமஸ்கிருதம் படித்தால் மேலோகத்தில் பெருமையுடன் வாழலாம். தமிழ் படித்தால் இரண்டு லோகங்களிலும் பெருமையுடன் வாழலாம்!'' என்று கூறினார்.

இந்தத் தமிழ்ப்பற்றினால்தான் அழியும் நிலையில் இருந்த எண்ணற்ற சாகாவரம் பெற்ற நூல்களை அச்சுப் பதிப்பேற்றி அழியாமல் காப்பாற்றினார் உ.வே.சாமிநாதய்யர்.

-கி.கிருஷ்ணசாமி, தூத்துக்குடி.
dinamani

by **அ.இராமநாதன்** Tue Mar 31, 2020 9:04 pm

பதில்

நேருஜி, ஹார்வர்ட் பல்கலைக்கழகத்தில் படித்துக் கொண்டிருந்தார். அப்போது அவருடைய தந்தை மோதிலால் நேரு, வாரம் ஒருமுறை அவருக்குப் பணம் அனுப்புவார்.

ஒருமுறை நேரு, மேலும் பணம் தேவை என்று தந்தைக்குக் கடிதம் எழுதினார்.

கடிதத்தைக் கண்ட மோதிலால் நேரு, இரண்டாம் முறையாகப் பணம் கேட்கிறானே பிள்ளை, என்ன செலவு செய்கிறானோ? என்ற எண்ணத்தில்,

""முன்பு அனுப்பிய பணத்துக்குக் கணக்கு அனுப்பவும்..'' என்று கடிதம் போட்டார்.

கடிதத்தைப் படித்த நேரு, பதில் கடிதம் அனுப்பினார். அந்தப் பதிலைக் கண்டதும் மோதிலால் நேரு மறுவார்த்தை பேசாமல் மகன் கேட்ட பணத்தை உடனடியாக அனுப்பி வைத்தார். தந்தை அப்படிச் செய்வதற்கு நேரு அனுப்பிய பதில் இதுதான் -

""என் மீது உங்களுக்கு நம்பிக்கை இருந்தால், என்னிடம் கணக்கு கேட்க வேண்டிய அவசியம் இல்லை. அப்படி நம்பிக்கையில்லாத பட்சத்தில் நான் அனுப்பும் கணக்கினால் உங்களுக்கு பலனில்லை..!''

-முக்கிமலை நஞ்சன்.
dinamani

by **அ.இராமநாதன்** Tue Mar 31, 2020 9:04 pm

நல்ல அரிசி!

காமராசர் முதல்வராக இருந்தபோது நடந்த நிகழ்வு இது.

தன்னுடைய உதவியாளர் வைரவனிடம், ""இந்த வீட்ல நாம ரெண்டு பேருதான். அரிசி பருப்பெல்லாம் பக்கத்தில இருக்கிற ரேஷன் கடையில வாங்கிக்கோ. ஜனங்க என்ன சாப்பிடுறாங்களோ அதுதான் நம்ம சாப்பாடு!'' என்றார்.

""ரேஷன்ல வாங்குற அரிசி ஒரு மாதிரி வாடை வீசுதுய்யா... வேற மாத்திடலாமா? நல்ல அரிசி சாப்பிடலாம்!'' என்றார் வைரவன்.

இதைக் கேட்ட காமராசருக்கு எரிச்சலும் கோபமும் வந்துவிட்டது.

""முதலமைச்சர்தாம்லே இந்த அரிசியைச் சாப்பிடணும்! இந்த மக்களுக்கு என்னிக்கு நல்ல அரிசி கிடைக்குதோ, அன்னிக்கு நானும் நல்ல அரிசி சாப்பிடலாம்!'' என்றார்.

-ஆச்சா, செவல்குளம்.
dinamani

by **அ.இராமநாதன்** Tue Mar 31, 2020 9:05 pm

நாசூக்கு!

ஒருமுறை கலைவாணர் இல்லத் திருமண விழாவில் விருந்து நடைபெற்றுக் கொண்டிருந்தது.

கலைவாணரின் திரையுலக நண்பர்கள் மற்றும் ஏராளமான பேர் விருந்து சாப்பிட்டுக் கொண்டிருந்தனர். கலைவாணரும் அவர்களுடன் அமர்ந்து சாப்பிட்டுக் கொண்டிருந்தார்.

அப்போது சோற்றில் இருந்த கல்லை நறுக்கென்று கலைவாணர் கடித்துவிட்டார்.

அந்தக் கல்லை கையில் எடுத்துக் கொண்டு, சமையல்காரரைக் கூப்பிட்டார்.

அவர் வந்ததும், ""தம்பி, உன் முதலாளியை மட்டும் தனியாகக் கவனிக்கிறது மத்தவங்களை அலட்சியப்படுத்துவது மாதிரியில்லே இருக்கும்! இப்படிச் செய்யலாமா? ஒரு விருந்துன்னா எல்லோரையும் சமமா, ஒன்னு போலக் கவனிக்கணும். அவங்களுக்கும் ஆளுக்கு இதமாதிரி கல்லைப் போடுப்பா!''

என்று தன் சோற்றில் கிடந்த கல்லைக் காட்டினார்.

நகைச்சுவையோடு நாசூக்காக சமையல்காரரின் தவறை, இப்படிச் சுட்டிக் காட்டினார் கலைவாணர்.

-க.பரமசிவன், மதுரை.
dinamani

by Sponsored content

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

புகழ் பெற்றவர்கள் வாழ்வில் நடந்த சுவையான சம்பவங்கள்

புகழ் பெற்றவர்கள் வாழ்வில் நடந்த சுவையான சம்பவங்கள்

Re: புகழ் பெற்றவர்கள் வாழ்வில் நடந்த சுவையான சம்பவங்கள்

Re: புகழ் பெற்றவர்கள் வாழ்வில் நடந்த சுவையான சம்பவங்கள்

Re: புகழ் பெற்றவர்கள் வாழ்வில் நடந்த சுவையான சம்பவங்கள்

Re: புகழ் பெற்றவர்கள் வாழ்வில் நடந்த சுவையான சம்பவங்கள்

Re: புகழ் பெற்றவர்கள் வாழ்வில் நடந்த சுவையான சம்பவங்கள்

Re: புகழ் பெற்றவர்கள் வாழ்வில் நடந்த சுவையான சம்பவங்கள்

Re: புகழ் பெற்றவர்கள் வாழ்வில் நடந்த சுவையான சம்பவங்கள்

Re: புகழ் பெற்றவர்கள் வாழ்வில் நடந்த சுவையான சம்பவங்கள்

Re: புகழ் பெற்றவர்கள் வாழ்வில் நடந்த சுவையான சம்பவங்கள்

Re: புகழ் பெற்றவர்கள் வாழ்வில் நடந்த சுவையான சம்பவங்கள்