புகழ் பொற்றவர்கள் வாழ்வில் ..... (:ஒட

by **அ.இராமநாதன்** Sun Dec 14, 2014 10:23 pm

அதுதான் சரி!

சென்னை மாணவர் மன்றம் வெளியிட்ட
மலர் ஒன்றுக்காக கவிஞர் கண்ணதாசன்
கவிதை ஒன்று எழுதிக் கொடுக்க வேண்டும்
என்று அவரது உதவியாளர் புகழேந்தியிடம்
கேட்டிருந்தார்கள்.
-
அந்த நேரம் அதை எழுதித் தரமுடியாத அளவில்
பிஸியாக இருந்தார் கண்ணதாசன்.
அதைச் சொல்லாமல் புகழேந்தியே, கவிஞர்
பாணியில் ஒரு கவிதை எழுதி கவிஞர் பெயரிலேயே
அனுப்பி விட்டார்.

அந்தக் கவிதை கவிஞருக்கு ஏராளமான
பாராட்டுதல்களைப் பெற்றுத் தந்தது.

ஆச்சரியமடைந்த கவிஞர் புகழேந்தியை அது
பற்றிக் கேட்க, அவர் நடந்ததைச் சொன்னார்.

""உன் பெயர் போட்டே எழுதியிருக்கலாமே...'' என்று
கேட்ட கவிஞர், உடனே மாணவர் மன்றத்துக்குப் போன்
செய்து ""அந்தக் கவிதையை நான் எழுதவில்லை.
என் உதவியாளர் புகழேந்தி எழுதியது. பாராட்டுகள்
எல்லாம் அவருக்குத்தான் சேர வேண்டும்'' என்று
கூறினார் கவிஞர்.
-
---------------------------------------------------------------------------

-க.பரமசிவன், மதுரை.
dinamani

by **அ.இராமநாதன்** Sun Dec 14, 2014 10:24 pm

மறதி!

வெறிநாய்க் கடிக்கு மருந்து கண்ட விஞ்ஞானியான லூயி பாஸ்டருக்கு மறதி அதிகம்.
அவரது திருமண நாளன்றுகூடத் தமது ஆய்வுக்கூடத்தில் மும்முரமாக ஆராய்ச்சியில் ஈடுபட்டிருந்தார்.
திருமண நேரம் நெருங்கிக் கொண்டிருந்தது. லூயி பாஸ்டரைக் காணாமல் தவித்த அவரது நண்பர்கள் அவரைத் தேடி ஆராய்ச்சிக்கூடத்துக்குள் வந்தனர்.
நண்பர் ஒருவர் வேகமாக, ""உங்களுக்குத் திருமணம். சீக்கிரம் வாருங்கள்!'' என்றார்.
ஆனால் பாஸ்டர் அமைதியாக, ""ஏன் அவசரப்படுகிறீர்கள். முதலில் திருமணம் முடியட்டும். பிறகு வந்து கலந்து கொள்கிறேன்'' என்றார்.

-நெ.இராமன், சென்னை.
dinamani

by **அ.இராமநாதன்** Sun Dec 14, 2014 10:25 pm

பண்பு!

ஒருமுறை கல்கி தனது இல்லத் திருமணத்துக்கு தந்தை பெரியாரை அழைத்திருந்தார். காலையிலேயே பெரியார் வருவதாக இருந்தது. இருந்தாலும் அவர் வரவில்லை. இதனால் கல்கிக்கு சற்று வருத்தமாகப் போய்விட்டது.
ஆனால் திடீரென்று மாலையில் பெரியார் திருமண வீட்டுக்கு வந்தார். கல்கிக்கு ஆச்சரியமாகப் போய்விட்டது.
பெரியாரிடம், கல்கி, ""ஏன் காலையிலேயே வரவில்லை'' என்று கேட்டார்.
அதற்குப் பெரியார், ""நான் கருப்புச் சட்டை அணிபவன். உங்கள் இல்லத்தில் சுபநிகழ்ச்சி நடக்கும்போது, உங்கள் சுற்றத்தாருக்கு அது அபசகுனமாகத் தோன்றும். எனவேதான் காலையில் வராமல் இப்போது வந்தேன்'' என்று விளக்கமளித்தார்.
பெரியாரது உயர்ந்த பண்பு கண்டு அனைவரும் வியந்து போனார்கள்.

-என்.காளிதாஸ், சிதம்பரம்.

by **அ.இராமநாதன்** Sun Dec 14, 2014 10:25 pm

மை!

ஒருசமயம் எழுத்தாளர் மாநாட்டில் கலந்துகொண்டு பேசும்போது கலைவாணர் என்.எஸ்.கிருஷ்ணன், ""எழுத்தாளர்கள் தங்கள் பேனாவை எப்படிப்பட்ட மை தொட்டு எழுதுகிறார்கள் தெரியுமா? சிலர் பெருமையில் எழுதுகிறார்கள். வேறு சிலர் பொறாமையில் எழுதுகிறார்கள். சிலர் தற்பெருமையைத் தொட்டு எழுதுகிறார்கள். ஆனால் தொடக்கூடாத மை மடைமை, கயமை, பொய்மை, வேற்றுமை.
நன்மை தரக்கூடிய செம்மை, நேர்மை, புதுமை ஆகியவற்றைத் தொட்டு வாசகர்களின் மனதைத் தொடும்படியாக எழுத வேண்டும்.
எழுத்தாளர்கள் நீக்க வேண்டிய மைகள் - வறுமை, ஏழ்மை, கல்லாமை, மடைமை, அறியாமை. இந்த நோக்கத்தையே எழுத்தாளர்கள் கடமையாகவும் உரிமையாகவும் கொள்ள வேண்டும்'' என்று குறிப்பிட்டார்.
இடம், பொருள், ஏவல் அறிந்து அதற்கேற்றபடி பேசுவதில் கலைவாணர் வல்லவர் என்பதை இந்த உரையின் மூலம் அறியலாம்.

-ஆச்சா, செவல்குளம்.

by **அ.இராமநாதன்** Sun Dec 14, 2014 10:32 pm

அகிம்சை கற்பித்த குறள்!

உலகப் புகழ்பெற்ற ரஷ்ய எழுத்தாளர் லியோ டால்ஸ்டாய். இவரை மகாத்மா காந்தியடிகள் தன் குருவாக ஏற்றுக் கொண்டார். டால்ஸ்டாயின் "போரும் அமைதியும்' அகிம்சை தத்துவத்தின் பிரதிபலிப்பே. அத்துடன் அவர் எழுதிய "அன்னா கரீனா' என்ற நூலும் அகிம்சைத் தத்துவத்தின் விளக்கமே.
காந்தியடிகள் ஒருமுறை டால்ஸ்டாயைச் சந்தித்தபோது, ""அகிம்சையை மையப்படுத்தி நவீனங்கள் படைத்துள்ளீர்களே, அது எப்படி?'' என்று வினவினார்.
அதற்கு டால்ஸ்டாய் சொன்ன பதில் -
""உங்கள் நாட்டில் தோன்றிய திருக்குறளின் ஆங்கில மொழிபெயர்ப்பைப் படித்துத்தான் அகிம்சை பற்றி நான் தெரிந்து கொண்டேன்!''

- அ.சா.குருசாமி, செவல்குளம்
dinamani

by **அ.இராமநாதன்** Sun Dec 14, 2014 10:32 pm

முதல் வந்த நினைவு

பழம்பெரும் காங்கிரஸ் தலைவர்களில் ஒருவரான டாக்டர் பி.சி.ராய், தம்முடைய எண்பதாவது பிறந்த நாளின்போது தம்மை வாழ்த்த வந்த பற்பல அரசியல் தலைவர்களுடன் பேசிக் கொண்டிருந்தார். அப்போது ஒரு நிருபர் டாக்டர் ராய் அவர்களிடம், ""இந்தப் பிறந்த நாளின்போது யாருடைய நினைவு முதலில் வந்தது?'' என்று கேட்டார்.
அதற்கு ராய் அவர்கள், ""சுதந்திரப் போராட்ட காலங்கள் மற்றும் பல சந்தர்ப்பங்களில் காந்தி அடிகள், பண்டித நேரு, வல்லபாய் படேல், அபுல்கலாம் போன்ற தலைவர்களுடன் நெருங்கிப் பழகியுள்ளேன். அவர்களுடைய நினைவுகள் எல்லாம் எனக்கு வராமல், எளிய உருவமுடன் ஏழை மக்களின் நலனில் அக்கறையும் கொண்டு சதாசர்வகாலமும் தொண்டுசெய்துவரும் அன்னை தெரசா அவர்களின் கருணை நிரம்பிய முகம்தான் என் நினைவில் வருகிறது...'' என்று ஒளிவுமறைவின்றிக் கூறியது, அனைவருடைய நெஞ்சத்தையும் நெகிழவைத்தது.

- ஜி.பென்னி, விழுப்புரம்.
dinamani

by Sponsored content

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

புகழ் பொற்றவர்கள் வாழ்வில் ..... (:ஒட

புகழ் பொற்றவர்கள் வாழ்வில் ..... (:ஒட

Re: புகழ் பொற்றவர்கள் வாழ்வில் ..... (:ஒட

Re: புகழ் பொற்றவர்கள் வாழ்வில் ..... (:ஒட

Re: புகழ் பொற்றவர்கள் வாழ்வில் ..... (:ஒட

Re: புகழ் பொற்றவர்கள் வாழ்வில் ..... (:ஒட

Re: புகழ் பொற்றவர்கள் வாழ்வில் ..... (:ஒட

Re: புகழ் பொற்றவர்கள் வாழ்வில் ..... (:ஒட