கிழக்கு மாகாணத்தில் தொடர்ச்சியாகப் பெய்துவரும் அடை மழையின் காரணமாக பாதிக்கப்பட்ட மக்களின் எண்ணிக்கை 8 இலட்சத்தையும் தாண்டியுள்ளது. மட்டக்களப்பு, அம்பாறை, திருகோணமலை ஆகிய மாவட்டங்கள் வெள்ளத்தில் மூழ்கியுள்ளதால் மக்களின் இயல்புவாழ்க்கை முற்றாக பாதிக்கப்பட்டுள்ளது. மட்டக்களப்பு மாவட்டத்தில் ஒரு இலட்சத்து 27 ஆயிரத்து 980 குடும்பங்களைச் சேர்ந்த 4 இலட்சத்து 82 ஆயிரத்து 890 பேர் பாதிக்கப்பட்டுள்ளனர்.
இவர்களில் 14 ஆயிரத்து 549 குடும்பங்களைச் சேர்ந்த 55 ஆயிரத்து 345 பேர் 146 நலன்புரி நிலையங்களில் தங்க வைக்கப்ட்டுளனர். 47 ஆயிரத்து 156 குடும்பங்களைச் சேர்ந்த 1 லட்சத்து 79 ஆயிரத்து 976 பேர் உறவினர்கள் மற்றும் நண்பர்களின் வீடுகளில் தங்கியுள்ளனர்.
வெள்ளத்தினால் மட்டக்களப்பு மாவட்டத்தில் 61 ஆயிரத்து 529 குடும்பங்களைச் சேர்ந்த 2 லட்சத்து 32 ஆயிரத்து 571 பேர் இடம்பெயர்ந்துள்ளனர். இதேபோல் அம்பாறை மாவட்டத்தில் 81 ஆயிரத்து 574 குடும்பங்களைச் சேர்ந்த 3 இலட்சத்து 12ஆயிரத்து 210 பேர் பாதிக்கப்பட்டுள்ளனர். இவர்களில் பெருமளவானோர் நலன்புரி முகாம்களிலும் மற்றும் உ றவினர், நண்பர்கள் வீடுகளிலும் தஞ்சம் புகுந்துள்ளனர்.
மட்டக்களப்பு மாவட்டத்தில் வவுணதீவுப் பாலம், பனிச்சங்கேணி பாலத்தினூடான போக்குவரத்து துண்டிக்கப்ட்டுள்ளது. கிரான் பிரதேசத்திலிருந்து புலிபாய்ந்த கல் பிரதேசத்துக்கான போக்குவரத்தும் தடைப்பட்டுள்ளது. இதேபோன்று மட்டக்களப்பு மாவட்டத்தில் வவுணதீவு பிரதேச செயலாளர் பிரிவு, கிரான் பிரதேச செயலாளர் பிரிவு, செங்கலடி பிரதேச செயலாளர் பிரிவு, வெல்லாவெளி பிரதேச செயலாளர் பிரிவுகளில் பல கிராமங்களுடனான தொடர்புகள் துண்டிக்கப்பட்டுள்ளன. இங்கு படகு மூலம் போக்குவரத்து செய்வதுகூட கஷ்டமான காரியமாக மாறியுள்ளது. வாவி நீர் பல கிராமங்களுக்குள் புகுந்துள்ளதால் வாவியையும் குளங்களையும் அண்டிய கிராமங்களும் வெள்ளத்தில் மூழ்கியுள்ளன.
பெருமளவான மக்கள் இடம்பெயர்ந்து நலன்புரி முகாம்களில் தங்க வைக்கப்ட்டுள்ளபோதிலும் இவர்களுக்கான சமைத்த உணவு மற்றும் உலர் உணவு வழங்கும் நடைமுறையில் பெரும் குறைபாடுகள் காணப்படுவதாக சுட்டிக்காட்டப்பட்டுள்ளது. போதியளவு சமைத்த உணவு மற்றும் நிவாரணங்கள் வழங்கப்படாமையினால் மக்கள் பெரும் அவலத்தினை சந்தித்து வருவதாக தெரிவிக்கப்படுகின்றது.

ரொம்ப பரிதாபம இருக்கு