நோபல் பரிசு பெற்றவரின் மனைவியை காணவில்லை

by **சூரியன்** Tue Oct 12, 2010 12:01 pm

அமைதிக்கான நோபல் பரிசு அறிவிக்கப்பட்டுள்ள சீனாவைச் சேர்ந்த லியு ஜியாபோவின் மனைவியைக் காணவில்லை.சீனாவில் ஜனநாயகம் கோரி போராடி வந்த லியு ஜியாபோவுக்கு, சீன அரசு 11 ஆண்டு கால சிறைத் தண்டனை விதித்துள்ளது.
தற்போது சிறையில் உள்ள லியு ஜியாபோவுக்கு இந்த ஆண்டு அமைதிக்கான நோபல் பரிசு அறிவிக்கப்பட்டுள்ளது. லியு ஜியாபோவுக்கு நோபல் பரிசு அறிவிக்கப்பட்டுள்ளதை, சீனா கண்டனம் செய்துள்ளது. நோபல் பரிசு அறிவிக்கப்பட்டுள்ள தனது கணவரை விடுதலை செய்ய வேண்டும் என லியு ஜியாபோவின் மனைவி கோரினார்.

இதற்கிடையே அவரை கடந்த 8ஆம் திகதி முதல் காணவில்லை என லியு ஜியாபோவின் வழக்கறிஞர் தெரிவித்துள்ளார்.நோபல் பரிசு பெற்ற தகவலை கணவரிடம் சொல்வதற்காக அவரை பொலிசார் அழைத்துச் சென்றதாகக் கூறப்படுகிறது. ஆனால், இத்தகவலை அறிய முயன்ற பத்திரிகையாளர்களை பாதுகாப்பு படையினர் அனுமதிக்கவில்லை.

வெளிநாட்டு பத்திரிகையாளர்களுக்கு அவர் பேட்டியளிக்கக்கூடும் என்பதால், அவரை அடையாளம் தெரியாத இடத்தில் வீட்டுச் சிறையில் சீன அரசு அடைத்துள்ளதாக சிலர் கூறுகின்றனர்.

இதற்கிடையே சிறையில் உள்ள கணவனை சந்தித்து நோபல் பரிசு பெற்ற தகவலை ஜியோபோவின் மனைவி தெரிவித்ததாக ஹாங்காங்கில் உள்ள மனித உரிமை அமைப்பு, ஜியோபோவின் மாமியாருக்கு அனுப்பியுள்ள செய்தியில் தெரிவித்துள்ளது.