மும்பை: ஐ.பி.எல்., லீக்
போட்டியில் பத்ரிநாத் அரைசதம் அடித்து கைகொடுக்க, சென்னை சூப்பர் கிங்ஸ்
அணி 8 விக்கெட் வித்தியாசத்தில் புனே வாரியர்ஸ் அணியை வீழ்த்தியது.
பேட்டிங், பவுலிங்கில் சோபிக்கத்தவறிய யுவராஜ் அணி, மீண்டும் ஒரு முறை தோனி
அணியிடம் தோல்வி அடைந்து ஏமாற்றியது.
நான்காவது ஐ.பி.எல்., தொடர்,
இந்திய மண்ணில் நடக்கிறது. நேற்று மும்பையில் உள்ள டி.ஒய். படேல்
மைதானத்தில் நடந்த லீக் போட்டியில் சென்னை சூப்பர் கிங்ஸ், புனே வாரியர்ஸ்
அணிகள் மோதின. "டாஸ்' வென்ற புனே அணி கேப்டன் யுவராஜ் சிங், "பேட்டிங்'
தேர்வு செய்தார்.
"டாப்-ஆர்டர்' சரிவு:
புனே
அணி, சென்னை அணியின் வேகப்பந்துவீச்சில் திணறல் துவக்கம் கண்டது.
போலிஞ்சர் பந்தில் ஜெசி ரைடர் (19) அவுட்டானார். அதே ஓவரில் மோனிஷ்
மிஸ்ராவும் (2) சரணடைந்தார். அடுத்து வந்த மிதுன் மன்ஹாஸ் (0), குலசேகரா
வேகத்தில் போல்டானார். இளம் வீரர் மனீஷ் பாண்டே (10), டிம் சவுத்தி பந்தில்
வெளியேறினார். புனே அணி, 41 ரன்களுக்கு 4 விக்கெட்டை இழந்து திணறியது.
உத்தப்பா அபாரம்:
பின்
யுவராஜ் சிங்-ராபின் உத்தப்பா ஜோடி பொறுப்பாக ஆடியது. அபாரமாக ஆடிய
உத்தப்பா, அஷ்வின் ஓவரில் இரண்டு "சிக்சர்' விளாசினார். ஐந்தாவது
விக்கெட்டுக்கு 42 ரன்கள் சேர்த்த நிலையில், அஷ்வின் சுழலில் உத்தப்பா(31)
சிக்கினார். அடுத்து வந்த மிட்சல் மார்ஷ் (11), போலிஞ்சர் வேகத்தில்
பெவிலியன் திரும்பினார்.
யுவராஜ் அரைசதம்:
தனது
அபார ஆட்டத்தை தொடர்ந்த யுவராஜ், சவுத்தி வீசிய ஓவரில் இரண்டு இமாலய
"சிக்சர்' அடித்து, ஐ.பி.எல்., அரங்கில் தனது 5வது அரைசதத்தை பதிவு
செய்தார். புனே அணி, 20 ஓவரில் 6 விக்கெட்டுக்கு 141 ரன்கள் எடுத்தது.
யுவராஜ் (62 ரன்கள், 4 சிக்சர், 3 பவுண்டரி) அவுட்டாகாமல் இருந்தனர்.
சென்னை கிங்ஸ் சார்பில் போலிஞ்சர் அதிகபட்சமாக 3 விக்கெட் வீழ்த்தினார்.
ஹசி ஏமாற்றம்:
எட்டக்
கூடிய இலக்கை விரட்டிய சென்னை அணிக்கு துவக்கத்தில் ஏமாற்றம். படுமந்தமாக
ஆடிய மைக்கேல் ஹசி (9), முரளி கார்த்திக் சுழலில் அவுட்டானார். பின்
பத்ரிநாத், முரளி விஜய் இணைந்து அசத்தினர். 2வது விக்கெட்டுக்கு 69 ரன்கள்
சேர்த்த நிலையில், முரளி விஜய் (31), ரைடர் பந்தில் வெளியேறினார்.
பத்ரிநாத் அரைசதம்:
அடுத்து
வந்த சுரேஷ் ரெய்னா ஒத்துழைக்க, தனது அசத்தல் ஆட்டத்தை தொடர்ந்தார்
பத்ரிநாத். முரளி கார்த்திக், யுவராஜ் சுழலில் தலா ஒரு "சிக்சர்' விளாசிய
பத்ரிநாத், ஐ.பி.எல்., அரங்கில் தனது 8வது அரைசதத்தை பதிவு செய்தார்.
மறுமுனையில் அதிரடியாக ரன் சேர்த்த ரெய்னா, ஜெரோம் டெய்லர் வீசிய
ஆட்டத்தின் 18வது ஓவரில் இரண்டு "சிக்சர்' அடித்தார். தாமஸ் வீசிய கடைசி
ஓவரில், ஒரு "சூப்பர் பவுண்டரி' அடித்த பத்ரிநாத், வெற்றியை உறுதி
செய்தார்.
சென்னை அணி 19.3 ஓவரில் 2 விக்கெட்டுக்கு 145 ரன்கள் எடுத்து
வெற்றி பெற்றது. பத்ரிநாத் (63 ரன்கள், 2 சிக்சர், 6 பவுண்டரி), ரெய்னா (34
ரன்கள், 2 சிக்சர், ஒரு பவுண்டரி) அவுட்டாகாமல் இருந்தனர்.
ஆட்ட நாயகனாக சென்னை அணியின் போலிஞ்சர் தேர்வு செய்யப்பட்டார்.
ஸ்கோர் போர்டு
புனே வாரியர்ஸ்
ரைடர் (கே)அனிருதா (ப)போலிஞ்சர் 19(12)
மோனிஷ் (கே)ஜகாதி (ப)போலிஞ்சர் 2(9)
பாண்டே (கே)அஷ்வின் (ப)சவுத்தி 10(13)
மன்ஹாஸ் (ப)குலசேகரா 0(4)
யுவராஜ் -அவுட் இல்லை- 62(43)
உத்தப்பா (கே)அனிருதா (ப)அஷ்வின் 31(22)
மார்ஷ் (கே)அஷ்வின் (ப)போலிஞ்சர் 11(15)
ஜெரோம் -அவுட் இல்லை- 1(2)
உதிரிகள் 5
மொத்தம் (20 ஓவரில், 6 விக்.,) 141
விக்கெட் வீழ்ச்சி: 1-22(ரைடர்), 2-22(மோனிஷ்), 3-28(மன்ஹாஸ்), 4-41(பாண்டே), 5-83(உத்தப்பா), 6-(மார்ஷ்).
பந்துவீச்சு: குலசேகரா 3-0-26-1, போலிஞ்சர் 4-1-21-3, சவுத்தி 4-0-33-1, அஷ்வின் 4-0-29-1, ஜகாதி 2-0-15-0, ரெய்னா 3-0-16-0.
சென்னை சூப்பர் கிங்ஸ்
ஹசி (கே)பாண்டே (ப)கார்த்திக் 9(18)
முரளிவிஜய் (கே)மன்ஹாஸ் (ப)ரைடர் 31(31)
பத்ரிநாத் -அவுட் இல்லை- 63(44)
ரெய்னா -அவுட் இல்லை- 34(25)
உதிரிகள் 8
மொத்தம் (19.3 ஓவரில், 2 விக்.,) 145
விக்கெட் வீழ்ச்சி: 1-19(ஹசி), 2-80(முரளிவிஜய்).
பந்துவீச்சு:
தாமஸ் 3.3-1-24-0, ஜெரோம் 4-0-27-0, கார்த்திக் 4-1-27-1, மார்ஷ் 1-0-7-0,
ராகுல் சர்மா 4-0-27-0, யுவராஜ் 1-0-10-0, ரைடர் 2-0-21-1.
உத்தப்பா "1000'
ஐ.பி.எல்.,
அரங்கில், ராபின் உத்தப்பா ஆயிரம் ரன்கள் என்ற புதிய மைல்கல்லை எட்டினார்.
நேற்று சென்னை அணிக்கு எதிராக 22 பந்தில் 31 ரன்கள் எடுத்த இவர், 29வது
ரன்னை கடந்த போது இச்சாதனை படைத்தார். இதுவரை இவர், 51 போட்டிகளில்
பங்கேற்று 4 அரைசதம் உட்பட 1002 ரன்கள் எடுத்துள்ளார். இதன்மூலம் இச்சாதனை
படைத்த 15வது வீரர் என்ற பெருமை பெற்றார்.
ரெய்னா "1500'
நேற்று
பேட்டிங்கில் அசத்திய சென்னை அணியின் சுரேஷ் ரெய்னா, ஐ.பி.எல்., அரங்கில்
1500 ரன்களை கடந்த முதல் வீரர் என்ற புதிய சாதனை படைத்தார். புனே
பந்துவீச்சை பதம்பார்த்த இவர், 25 பந்தில் 34 ரன்கள் எடுத்தார். இவர், தனது
6வது ரன்னை கடந்த போது இச்சாதனை படைத்தார். இதுவரை இவர், 53 போட்டிகளில்
பங்கேற்று 10 அரைசதம் உட்பட 1528 ரன்கள் எடுத்துள்ளார். இரண்டாவது இடத்தில்
மும்பை அணி கேப்டன் சச்சின் (41 போட்டி, 1439 ரன்கள்) உள்ளார்.

நன்றி தினமலர்