அருவி ! கவிதை இலக்கியக் காலாண்டிதழ் ! நூல் ஆசிரியர் : கவிஞர் காவனூர் ந. சீனிவாசன்

by **eraeravi** Fri Sep 12, 2014 8:07 pm

அருவி !
கவிதை இலக்கியக் காலாண்டிதழ் !

நூல் ஆசிரியர் : கவிஞர் காவனூர் ந. சீனிவாசன்.இதழ் விமர்சனம் : கவிஞர் இரா. இரவி.

14, நேரு பஜார், திமிரி 632 512, ஆற்காடு வட்டம், வேலூர் மாவட்டம்,மின் அஞ்சல் aruvisrinivasan@gmail.com

அலைபேசி 9600898806.

தனி இதழ் ரூ. 25, ஆண்டு சந்தா ரூ. 100

*****

‘அருவி’ பெயருக்கேற்றபடி கவிதை அருவியாக கொட்டி வருகின்றது. 144 பக்கங்களில் மரபு, புதியது, ஹைக்கூ என மூன்றும் தாங்கி வரும் முத்தாய்ப்பு இதழாக உள்ளது. இதழாசிரியர் கவிஞர் காவனூர் ந. சீனிவாசன் அவர்களின் கடின உழைப்பை உணர முடிகின்றது. உலகம் முழுவதுமுள்ள முன்னணிக் கவிஞர்களிடமிருந்து கவிதைகளைப் பெற்று தேர்ந்தெடுத்து தொகுத்து இதழாக்கி வருகிறார்கள். நூல் விமர்சனங்களும் இடம் பெற்று இருந்தது. படைப்பாளிகள் அனைவரின் அலைபேசியும் உள்ள ஆவணமாக இருந்தது. படித்து விட்டு தூக்கிப்போடும் சராசரி இதழ் அல்ல இது. படித்து விட்டு பாதுகாக்க வேண்டிய இதழாக உள்ளது. பாராட்டுக்கள்.

மரபுக் கவிதையிலிருந்து சிறு துளிகள்.

பாவலர் இராம. இளங்கோவன்

மாற்றமில்லா மாத்தமிழே அமுதமென்பேன்
       மற்றெதிலும் திகட்டாத அமுதம் காணேன்
கவிஞர் ஆலந்தூர் மோகனரங்கன்
தலை உள்ளோர் அனைவருமே
       தமிழ் அருமை அறியுமட்டும்
       தளர மாட்டேன்.
கவிதைக்கான விளக்கமும் மிக நன்று.
கவிஞர் விக்ரமாதித்தன்

ஒரு கவிதை உங்களை ஏதாவது செய்ய வேண்டும். சந்தோஷப்படுத்த வேண்டும் அல்லது கலவரப்படுத்த வேண்டும். குறைந்தபட்சம் வாழ்வைப் பற்றி யோசிக்க வைக்கவாவது வேண்டும்.

மேலே சொன்ன வைர வரிகளை வளரும் கவிஞர்கள் யாவரும் மனதில் கொள்ள வேண்டும்.

நூலில் உள்ள எல்லாக் கவிதைகளும் சிறப்பாக உள்ளன. நூல் விமர்சனத்தில் எல்லாக் கவிதைகளையும் மேற்கோள் காட்ட இயலாது. பதச்சோறு சில மட்டும் உங்கள் ரசனைக்கு இதோ! நீண்ட கவிதைகளாக இருந்த போதும் மனதை நெகிழ்ச்சி அடைய வைத்த சில வரிகளை மட்டும் எழுதி உள்ளேன்.

மன்சூர் அலி, சவுதி அரேபியா, ரியாத்.

கண்களை
       விரலில் வைத்த
       கடவுளிடம் தான் கேட்க வேண்டும்
       யார் ஊனமுற்றவன் என்று.

பார்வையற்றவர்கள் விரல்களால் தடவியே உணர்கிறார்கள். அவர்களுக்கு விரல்களே விழியாக உள்ளது. அதனை மிக நுட்பமாக கவிதையில் உணர்த்தி உள்ளார்.

கவிஞர் அ. பிரமநாதன்

பண்டிகை நாளில் / பலகாரம் செய்யும் / அம்மாவிடம்
       எல்லாமும் எனக்கு என / அடம்பிடித்து / அழுகிறது குழந்தை
       சாமி / கண்ணைக் குத்திடும் / சாமி கும்பிட்ட பிறகு / சாப்பிடலாமென
       சமாதானம் சொல்லித் / தூளியில் தூங்க விடுகிறாள் / அம்மா
       தூளியில் / தூங்கி விடுகிறது / குழந்தை / சாமியும் /
       சாப்பிடவில்லை / கடைசி வரை.

கடவுளுக்கு படைக்கிறேன், பூஜை என்ற பெயரில் சிறு குழந்தை கேட்கும் போது கொடுக்காமல் இருப்பது தவறு என்பதை உணர்த்துகின்றார்.

புதுக்கவிதை எழுதுவதில், புதிதாக சிந்திப்பதில் தமிழர்கள் சளைத்தவர்கள் அல்ல என்பதை மெய்ப்பிக்கும் நூல் இது.

கவிஞர் வீ. உதயக்குமரன், வீரன்வயல்.

காதலியின் வருகையைத் / தடுத்து விட்டதே என / மழையைக்
கோபித்தேன் / நனைந்தபடி / வந்தாள் / என் / காதல் தேவதை
ரசித்தேன் / மழையில் நனைந்த / காதலியையும் / மழையையும்.

கவிதையைப் படிக்கும் போது, வாசகர்கள் மனதில் சில அதிர்வலைகளை உருவாக்க வேண்டும். அப்படிக் கவிதைகள் நூல் முழுவதும் நிரம்பி வழிகின்றன. இந்தக் கவிதை படித்த போது எனக்கு என்னுடைய பால்ய நினைவுகள் வந்து போயின. அது தான் ஒரு கவிஞனின் வெற்றி.

கவிஞர் வ.பி. எட்வின், திருநின்றவூர்

வலதுகையால் / இடது காதைத் / தொட்டபின் சேர்ந்த
       ஆரம்பப் பள்ளி / ஆரஞ்சு மிட்டாய் / கொடுத்த பின் / உட்காரக் கிடைத்த
       பள்ளியின் முதல் நட்பு / ஆசிரியர் / கைபிடித்து / எழுதப் பழகித் தந்த
       உயிர் எழுத்துக்கள் / புரிந்து கொள்ளாமல் / சண்டைப் போட்ட
       பள்ளி நாட்கள் / தாமதமாய் வந்ததால் / வகுப்பிற்கு வெளியே
       போட்ட முழங்கால் / மழலை அன்பில் / காக்கா கடி / கடிச்சுத் தின்ன
       கடலை மிட்டாய் / அன்பிற்கினிய / அந்த நாட்களை / மறக்க முடியுமா?

திருமணமானதும் பெண் பெற்றோர்களை மறப்பதே இல்லை. ஆனால் ஆண் திருமணமானாலும் பெற்றோரை மறந்து விடுகிறான். வளர்த்த பாசத்தை, செய்த தியாகத்தை எளிதில் மறந்து சுயநலவாதியாக மாறி, தன் மனைவி, தன் குழந்தைகள் என்று சுருங்கி விடுகிறான். அதனை உணர்த்திடும் கவிதை மிக நன்று.

கவிஞர் கு. ராம்குமார், வாடாமங்கலம்

பாத்திரங்கள் கழுவி / பத்திரமாய் வளர்த்து / ஆளாக்கினாள் அம்மா
       படிக்காமல் இருந்தும் / பட்டபடிப்பு படிக்க / வைத்தார் அப்பா
       படிப்பைப் பாதியில் / நிறுத்திவிட்டுக் குடும்பத்தைச் / சுமந்தான் தம்பி
       திருமண வயதைத் / தியாகம் செய்து / வேலையில் சேர்ந்தாள் அக்கா
       பதினைந்து சவரனோடு / பந்தமாகி பத்தே நாளில் / தனிக்குடித்தனம்
       வைத்தாள் மனைவி.
இந்த இதழில் எனது 7 ஹைக்கூ கவிதைகள் இடம் பெற்றுள்ளன.

இதில் உள்ள ஹைக்கூ கவிதைகள் அனைத்தும் தேர்ந்தெடுத்த முத்துக்களாக உள்ளன. சில மட்டும் உங்கள் பார்வைக்கு.

இரா. பூபாலன், பொள்ளாச்சி

வறண்ட குளக்கரை
இன்னுமிருக்கிறது
வலை!
முனைவர் மித்ரா
வீட்டில் வறுமை
தூங்கும் பசியோடு
பூனை!
கவிஞர் அமுதபாரதி, சென்னை.
கொஞ்சம் பொறுங்கள்
பிறகு கழுவலாம்
கோப்பைக்குள் எறும்பு.

இந்த ஹைக்கூ படித்தவுடன் கேரளாவில் நடந்த உண்மை நிகழ்வு என் நினைவுக்கு வந்தது,

குழியில் பெரிய தூணை யானையை வைத்து போட முயன்ற போது யானை மறுத்தது. பாகன் அடித்து துன்புறுத்தி போராடியும் யானை, தூணை பள்ளத்தில் போடவில்லை. என்ன காரணம் என்று பார்த்த போது அந்த குழியில் ஒரு பூனை இருந்ததாம். பூனை இறந்துவிடக் கூடாது என்பதற்காக யானை தூணை போட மறுத்ததாம்.மனிதாபிமானம் என்கிறோம் .இது விலங்காபிமானத்திற்கு எடுத்துகாட்டு .இது தான் ஒரு ஹைக்கூவின் வெற்றி. ஒன்று படிக்கும் போது அதனோடு தொடர்புடைய மற்றொன்று வாசகர் நினைவிற்கு வர வேண்டும்.

கவிஞர் காவனூர் ந. சீனிவாசன்

சிந்தாமல் / எடுத்துச் செல்ல முடியவில்லை / என்னால் / ஒரு
துளிக் கவிதையை / கோப்பையில் நிரப்பி.

இயற்கையை நன்கு பாடி உள்ளார். இதழை நன்கு தொகுத்துள்ளார். அடுத்த அருவியை ஆவலோடு எதிர் நோக்குகின்றேன்.

.

by **eraeravi** Mon Sep 29, 2014 11:45 pm

நன்றி
அன்புடன்
கவிஞர் இரா .இரவி

by Sponsored content

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

அருவி ! கவிதை இலக்கியக் காலாண்டிதழ் ! நூல் ஆசிரியர் : கவிஞர் காவனூர் ந. சீனிவாசன்

அருவி ! கவிதை இலக்கியக் காலாண்டிதழ் ! நூல் ஆசிரியர் : கவிஞர் காவனூர் ந. சீனிவாசன்

Re: அருவி ! கவிதை இலக்கியக் காலாண்டிதழ் ! நூல் ஆசிரியர் : கவிஞர் காவனூர் ந. சீனிவாசன்

Re: அருவி ! கவிதை இலக்கியக் காலாண்டிதழ் ! நூல் ஆசிரியர் : கவிஞர் காவனூர் ந. சீனிவாசன்

Re: அருவி ! கவிதை இலக்கியக் காலாண்டிதழ் ! நூல் ஆசிரியர் : கவிஞர் காவனூர் ந. சீனிவாசன்