வருக கர புத்தாண்டே! வருக! [/u] சிங்கை டாக்டர் மா.தியாகராசன்[u]
drthyagarajan2010@gmail.கம

நாட்காட்டி நகர்வதனால் நீ
ஆண்டு தோறும் நலம் காண
வருகிறாயா?

பஞ்சாங்க புத்தகத்தில் சஞ்சாரம்
செய்திடப் புறப்பட்டு வருகிறாய்
புதுமைகளைத் தருகிறாய்
காலண்டர் காகிதத்தில்
கண் சிமிட்டுகிறாய்
காலத்தின் வேகத்தில்
கரைந்து போகிறாய்

வானத்தின் நீளத்தை
அளந்து பார்க்கிறாய்
நாட்காட்டி என்னும்
நவீன வாகனத்தில் ஏறி வந்து
ஆண்டிற்கு ஒரு முறை அவதரிக்கிறாய்

அன்பினால் எங்களை
அரவணைக்கிறாய்
வரலாற்றுப் பக்கத்தில்
பதிந்து கொள்கிறாய்
சோகத்தைப் பலருக்குப்
பங்கு வைக்கிறாய்
சொர்க்கத்தைச் சிலருக்குத்
திறந்து வைக்கிறாய்

நாளுக்கு நாள் நீயும்
வளர்ந்து வருகிறாய்
நாட்டுக்கு நாடு ஏன்
வம்பு செய்கிறாய்

ஆணுக்கும் பெண்ணுக்கும்
இனிமை தருகிறாய்
ஆனாலும் சில நேரம்
கொடுமை செய்கிறாய்

பாலுக்கும் கூழுக்கும்
அழ வைக்கிறாய்
சிலரைப் பணத்தாலே
பல பாவம் செய்ய வைக்கிறாய்

புத்தாண்டே ஏவுகணைகளின்
தோளில் ஏறி வராதே
ஏர் முனையில் கீழே இறங்கி வா


விலைவாசியின் முடிவில் ஏறி வராதே
விளைச்சல் பெருகிட விரைந்து வா

என் மதம் உன் மதம் என்றிடும்
மனிதர்கள் சம்மதம் காணச்
சடுதியில் வா

மலர்களால் மண்ணுக்கு
மகுடம் சூட்ட வா
மனிதர்கள் மனதை ஒன்றாய் இணைக்க
வா. வருக புத்தாண்டே வருக

புத்தாண்டே
எங்கள் வாழ்க்கைப் பயணத்தின்
வசந்த விடியலே

எங்கள் மலரும் நினைவுகளின்
மலர்ச் சோலை வனமே

எங்களின் இருளை விரட்டும்
வெளிச்ச விடியலே

எங்கள் நாளைய வானத்தின்
நம்பிக்கை நட்சத்திரமே

எங்களின் எதிர்காலத்தையும்
இறந்த காலத்தையும்
எழுதி வைக்கும் நிகழ்கால நிஜமே

காலப்புத்தகத்தின் கணிதக் குறியீடே
கழிந்து போனாலும் கணக்கில்
இருக்கும் கல்வெட்டே
காலத்தின் அளவு கோலே

பூமியின் புனித நூலே
வசந்தத்தின் திறவுகோலே
வருக வாழ்வள்ளித் தருக !
கர புத்தாண்டே
கரவொலி எழுப்பி வா!

என்றென்றும்
அன்புடன்
சிங்கை டாக்டர் மா.தியாகராசன்

பாராட்டுக்கள் வரிகள் அனைத்துமே அருமை