படிக்க வேண்டும்..

by **அ.இராமநாதன்** Tue Mar 20, 2012 9:50 am

வாழையிலை அழகாக இருப்பதாலே
வான் மறைக்கக் குடிசைக்குக் கீற்றாய் ஆமோ
தாழைமரம் தென்னைப் போல இருப்பதாலே
தங்கியிருக்க வீட்டிற்குத் தூணாய் ஆமோ
-
பேழைக்குள் அடுக்கி நூலைப் பாதுகாத்தால்
பெருமறிவு தானாக வந்தா சேரும்
ஏழையவன் செல்வத்தைச் சேர்க்க எண்ணும்
ஏக்கம் போல் படித்தால்தான் அறிவு சேரும்!
-
கண்ணாடித் துகள்களினை வைரம் என்றே
கண் மயங்கி மதி மயங்கிப் போதல் போன்று
கண்மயக்கும் வனிதையரின் படங்கள் போட்டுக்
காட்சி காட்டும் நூல்களினை வாங்குகின்றார்
-
எண்ணத்தைச் சீராக்கும் கருத்தைக் கூறும்
ஏடுகளை நிதம் தேடிப் படிக்கும்போதே
உண்மையான உறுதி வந்து வாழ்வில் சேரும்
உயரிய அறிவு வந்து நம்மில் கூடும்!
-
நுனிப்புல்லை மேய்தல் போல நூலை மேய்ந்தால்
நுண்ணறிவு வாராது! மாட்டைப் போல
திணித்தவற்றை அசைபோட்டே அரைத்தல் போன்று
திருத்தமுறப் படித்தால்தான் நினைவில் நிற்கும்
-
பனிமுத்து பரிதிமுன்னே அழிதல் போலப்
பகுத்தணராப் படிப்பு நெஞ்சில் பதிந்தடாது
யனிமுத்தாய் ஒளி வீச நாளும் நாளும்
நல்ல நூலை ஆழமாகப் படிக்க வேண்டும்!
-
=======================================
>கருமலைத்தமிழாழன்
நன்றி; ஓம் சக்தி - டிசம்பர் 2011