பதிவு செய்த நாள்

01 அக்
2014
00:00

உமாதேவிபலராமன், திருவண்ணாமலை: உங்கள் முற்பிறவிகள் பற்றி நீங்கள் குறிப்பிட்டிருக்கிறீர்கள். யாராலும் முந்தின பிறவி பற்றியெல்லாம் நினைவு வைத்திருக்க முடியாது என்று என் தோழி அடித்துச் சொல்கிறாள். உங்களுக்கு மட்டும் எப்படி சாத்தியமாகும்?
முடியும், முடியாது என்பதெல்லாம் நபருக்கு நபர் மாறுபடும். நூறு மீட்டர் தொலைவை பத்து விநாடிக்குள் ஓடிக்காட்டுங்கள் என்று சொன்னால் முடியாது என்று நீங்கள் கை விரிப்பீர்கள். அதைவிடக் குறைந்த நேரத்தில் அதை அநாயாசமாகச் செய்து முடிப்பவர்களும் உலகத்தில் இருக்கிறார்கள் அல்லவா? அதனால் உங்கள் அனுபவத்தில் இல்லை என்ற ஒரே காரணத்துக்காக, எதையும் மறுக்காதீர்கள். என் அனுபவத்தை நான் சொன்னேன். அதை நீங்கள் கண்மூடித்தனமாக நம்பவேண்டும் என்ற எந்தக் கட்டாயமும் இல்லை. சொல்லப்போனால், யார் சொன்னதையும் அப்படியே நீங்கள் நம்பி ஏற்காமல், அனுபவ பூர்வமாக உணர முற்படுவதே நல்லது. அப்போதுதான் உங்கள் வாழ்க்கையை ஆழமாக, அழுத்தமாக வாழ்ந்து பார்க்க முடியும்.

மல்லிகா அன்பழகன், சென்னை-78: உண்மையைச் சொல்லுங்கள். நீங்கள் கடவுளைப் பார்த்திருக்கிறீர்களா?
நீங்கள் கேட்பதைப் பார்த்தால் அது இறந்த காலமாகத்தான் இருக்க வேண்டும் எனறு முடிவு செய்து விட்டது போலிருக்கறதே? உண்மையில், நிகழ்காலத்தில் கடவுளை அனுதினமும் ஒவ்வொரு கணத்திலும் நான் பார்த்துக் கொண்டுதான் இருக்கிறேன். கடவுளைத் தவிர வேறு எதையும் எங்கேயும் காணவில்லை.
எப்படி என்கிறீர்களா? கடவுள் என்று நீங்கள் எதைச் சொல்கிறீர்கள்? உங்களைச் சுற்றி படைக்கப்பட்டிருக்கும் இந்த பிரமாண்டத்தை உருவாக்கிய சக்தியைத்தானே? அந்த சக்தி எங்கே குடியிருக்கிறது? எங்கெல்லாம் படைப்பு நிகழ்கிறதோ, அங்கெல்லாம்தானே?
அதாவது அதோ அந்த மரத்தில், இந்தப் பூவில், உங்களில், என்னில் என்று எங்கும் நீக்கமற கடவுளைத் தவிர வேறு எதை நீங்கள் காணமுடியும்?
காலையில் நீங்கள் சாப்பிட்ட சிற்றுண்டி மாலைக்குள் உங்கள் உடலின் ஒரு பகுதியாக மாறுகிறதே, இந்த அற்புதத்தை யார் நிகழ்த்துவது? உங்களைப் படைத்தவர் தானே? அதை அவர் வெளியில் இருந்து கொண்டா செய்கிறார்? உங்களுக்குள் இருந்து கொண்டு அல்லவா செய்கிறார்? அப்படியானால் கடவுள் உஙகளுள் இருக்கிறார் அல்லவா?
ஒவ்வொரு படைபபிலும் அதைப் படைத்தவன் இருக்கிறான் என்று புரிந்துகொண்டதால் தினம் தினம் கணத்துக்குக் கணம் என்னிலும் என்னைச் சுற்றியுள்ள ஒவ்வொன்றிலும் கடவுளைக் காண்கிறேன். கண்டுகொண்டே இருக்கிறேன்.

வெ.கணேசன், அருப்புக்கோட்டை: ஒரு குறிப்பிட்ட மதத்தை ஆதரிப்பவர்கள் மட்டும்தான் ஈஷா யோகாவில் பலனடைய முடியுமா?
கிடையவே கிடையாது. நீங்கள் ஒரு கார் வாங்குகிறீர்கள், நீங்கள் கிறிஸ்தவராக இருநதால்தான் அது ஓடுமா? முஸ்லிம் இனத்தவர் என்றால் அதை இயக்க முடியாதா? நீங்கள் புத்தர் வழி நடப்பவரா, ஜைன மதத்தைச் சேர்ந்தவரா என்று இயக்கப்படும் இயந்திரம் பாகுபாடு பார்க்கிறதா? யோகாவும் அப்படித்தான். அது ஒரு விஞ்ஞானம். ஆண், பெண், மொழி, நாடு, மதம் என்று எந்தப் பிரிவினையும் அதற்குக் கிடையாது.
மதங்கள் தங்களுக்குள் ஒற்றுமை இன்றி பிரிந்து கிடக்கின்றன. ஒன்றை ஒன்று முட்டி மோதுகின்றன. சண்டையில் இறங்குகின்றன. யோகாவோ, பிரிவை மறந்து மற்ற ஒன்றுடன் ஐக்கிமாவது எப்படி என்று வழிகாட்டுகிறது. யோகா பயின்ற பிறகுதான் தங்கள் மதத்தின் வேர்களை முழுமையாக உணர முடிகிறது என்று பல மதத்தினர் என்னிடம் சொல்லியிருக்கிறார்கள்.
வெறும் நம்பிக்கைகளின் மீது நீங்கள் எழுப்பியிருக்கும் உங்கள் மதத்தின் உண்மை உருவை நீங்கள் தரிசித்ததில்லை. யோகா உங்கள் மதத்தின் ஆழங்களை அனுபவ பூர்வமாக உணர உங்களுக்குக் கதவுகளைத் திறந்து விடும்.

தேவகி வாசுதேவன், வில்லிவாக்கம்: பெண்கள் ருத்திராட்சம் அணியலாமா?
ஆண்கள் பெருமையுடனும், சுதந்திரத்துடனும் அணியக் கூடியவற்றை ஒரு பெண்ணும் அணியட்டுமே!
அதற்காகப் பத்து சங்கிலிகள் அணிந்து அதற்கு மேல் ருத்திராட்ச மாலையையும் ஓர் ஆபரணமாக அணிவதில் அர்த்தமில்லை. ஆண் ஆனாலும், பெண் ஆனாலும், தங்களை அடிமைப்படுத்தும் விலங்குகளைத் தகர்த்து விட்டதன் அடையாளமாகக் கருதி ருத்திராட்சத்தை அணிய வேண்டும். ருத்திராட்சம் அணிகையில், வாழ்க்கையின் அற்பத்தனமான விஷயங்களைக் கடந்து சென்று விட்டீர்கள் என்று அர்த்தம்.
அலங்காரத்துக்காக அணிவதும், நினைத்த போது கழற்றி வைப்பதுமாக கையாளக்கூடியதல்ல ருத்திராட்சம்.

எஸ். அஸ்வின் குமார், தஞ்சை: ஒரு குருவின் கடமை என்ன?
நான் சொல்வது உங்களுக்கு அதிர்ச்சியாக இருக்கலாம். ஒரு குருவின் நோக்கம் அடிப்படையில் அழிப்பதுதான்.
உங்களின் இன்றைய நிலையை அழித்தால்தான், இன்னும் பெரிதான ஒன்றை அனுபவிக்க நீங்கள் தயாராவீர்கள். சிறைப்பட்டுக் கிடக்ம் உங்கள் தளைகளை அவர் அறுத்தால்தான், எல்லையற்ற தன்மையை நீங்கள் ருசிக்க முடியும். உங்கள் அகங்காரத்தைத் தொடர்ந்து சிதைத்தால்தான் சில உயரங்களை உங்களால் தொடர முடியும். உங்களை உன்னத அனுபவங்களுக்கு எடுத்துச் செல்ல, இப்படி உங்கள் அடிப்படைகளை அழிக்கும் நண்பரே உங்கள் குரு.

வண்ணை கணேசன், சென்னை-110: நேரத்தை திறம்படத் திட்டமிட்டுப் பயன்படுத்துவது எப்படி?
நேற்று என்னவெல்லாம் செய்தீர்கள் என்று ஒன்றுவிடாமல், உங்களால் பட்டியலிட முடியுமா? முடியாது. ஏனென்றால், அதில் இரண்டு, அல்லது மூன் சதவீத வேலையைத்தான் நீங்கள் கவனத்தில் பதித்துச் செய்திருப்பீர்கள். மற்றச் செயல்கள் எல்லாம் கவனமின்றி, உங்கள் மனம் ஒருமுகப்படாமல் செய்யப்பட்டவை.
நீங்கள் வேலை மும்முரத்தில் இருப்பதை விட குருட்டுச் சிந்தனையில் இருக்கும் நேரமே அதிகம். அப்புறம் எப்படி நேரம் போதுமானதாக இருக்க முடியும்?
மனித மனம் மிகப் பெரும் சக்தி வாய்ந்தது. அதை முறையாகப் பயன்படுத்துவது எப்படி என்று அறிந்து கொண்டு விட்டீர்களென்றால், அற்புதமான பல செயல்களைப் புரிவீர்கள். நேரம் என்பது இரண்டாம் பட்சம்தான். இப்போது கிடைக்கும் நேரத்தின் பெரும்பகுதியில் என்ன செய்கிறோம் என்பதையே உணராமல் செய்து கொண்டிருப்பதால் சரியான பலனின்றிப் போகிறது.
ஆண்ட்ரூ கார்னகி பற்றிக் கேள்விப்பட்டிருக்கிறீர்களா? அமெரிக்காவின் மிகப் பெரும் பணக்காரர்களுள் ஒருவராக இருந்தவர். அவர் மிகக் குறுகிய காலத்தில் மிகப் பெரும் பணக்காரரானது அமெரிக்க அரசுக்கு சந்தேகத்தை உண்டு பணணியது. புலன் விசாரணைகள் நடத்தியும் அவர்களால் குற்றங்கள் எதையும் கண்டுபிடிக்க முடியவில்லை. பாராளுமன்ற உறுப்பினர்கள் அவரை நேரடியாகச் சந்தித்தனர். எப்படி இவ்வளவு குறுகிய காலத்தில் இவ்வளவு பணம் சேர்த்தீர்கள்? என்று கேட்டனர்.
கார்னகி சொன்னார், என்னால் தொடர்ந்து ஐந்து நிமிடங்களுக்கு மனதை ஒருமுகப்படுத்தி வைத்திருக்க முடியும். உங்களால் முடியுமா என்று பாருங்கள்!
அவர்கள் முயற்சி செய்தார்கள், தோற்றுப் போனார்கள்.
கார்னகி சொன்னா, உங்களால் ஐந்து நிமிடங்களுக்குக்கூட மனதை ஒருமுகப்படுத்தி வைக்க முடியவில்லை. இப்படிப்பட்ட மனதுடன் இருக்கும் நீங்கள் அமெரிக்காவை ஆள்வது எப்படி சரியாக இருக்கும்?
உங்கள் மனம் மிக அற்புதமானதோர் கருவி. நீங்கள் சொன்னதிலிருந்து தவறாமல், முழுமையாகச் செயல்பட உங்கள் மனதைத் தயார்ப் படுத்திவிட்டால், எந்தத் தொழிலையும் எந்த சிரமும் இல்லாமல், மிக எளிதாக செய்து முடிக்க இயலும்.


 
நன்றி-- குமுதம் பக்தி செய்திகள்: