விவாதம் நல்லது!

by **RAJABTHEEN** Sat Jan 22, 2011 4:03 am

சிலர் விடாமல் விவாதம் செய்வார்கள். சிலருக்கோ அது தேவையில்லாத ஒன்றாகத் தோன்றும். ஆனால் விவாதம் செய்வது உடல் ஆரோக்கியத்துக்கு நல்லது என்கிறது ஒரு புதிய ஆய்வு.

அமெரிக்காவின் மிச்சிகன் பல்கலைக்கழக சமூக ஆராய்ச்சிப் பிரிவு ஆய்வாளர் கிரா பிர்டிட்டும், அவரது சக ஆய்வாளர்களும் இதுதொடர்பான ஆய்வை மேற்கொண்டனர். ஒருவர் தனது மனைவி, மேல் அதிகாரி, குழந்தை ஆகியோருடன் டென்ஷனுக்கு உள்ளாகும்போது அதை வார்த்தையாக வெளிப்படுத்தாமல் அடக்கிவைப்பது ஆரோக்கியத்தைப் பாதிக்கும் என்று இவர்கள் கண்டுபிடித்திருக்கின்றனர். உடனே விவாதத்தில் ஈடுபடாமல் மவுனமாக விலகிச் செல்வதன் மூலம் பிரச்சினையைத் தவிர்ப்பது, மறுநாள் உடல்ரீதியான பிரச்சினைக்கான அறிகுறிகளை வெளிப்படுத்தக்கூடும் என்று இந்த ஆய்வாளர்கள் கூறுகின்றனர்.

சிறுசிறு பிரச்சினைகள், மனஅழுத்த ஹார்மோனான `கார்ட்டிசோலை’ அந்தந்த நாட்களில் அசாதாரண அளவுக்கு உயரவோ, தாழவோ வைக்கின்றன என்றும் கண்டு பிடிக்கப்பட்டிருக்கிறது.

“நமது அன்றாட மனநிலையில் உறவுகள் ஒரு முக்கியமான தாக்கத்தை ஏற்படுத்துகின்றன. குறிப்பாக உறவுகளிலேயே பிரச்சினை ஏற்படும்போது. பிரச்சினைகளை நாம் எவ்வாறு கையாளுகிறோம் என்பதைப் பொறுத்தே நமது அன்றாட நலம் இருக்கிறது” என்கிறார், பிர்டிட்.

இவர்கள் தங்களின் ஆய்வில் 33 முதல் 84 வயது வரையுள்ள ஆயிரத்து 842 பேரை உட்படுத்தினர். குறிப்பிட்ட நான்கு நாட்களுக்கு, பிரச்சினை ஏற்படும் சூழல்களில் அவர்கள் விவாதத்தில் ஈடுபட்டனரா அல்லது அவற்றைக் கண்டுகொள்ளாமல் விட்டனரா என்று கேட்டறியப்பட்டது. குறிப்பிட்ட காலத்துக்கு அவர்களிடம் இருந்து எச்சில் மாதிரியும் பெறப்பட்டு ஆய்வு செய்யப்பட்டது.

அதில் விவாதத்தில் ஈடுபட்டவர்களை விட, மவுனமாக விலகிச் சென்றவர்கள் உடல் நல பாதிப்புக்கு உள்ளாகும் வாய்ப்பு அதிகம் இருப்பது தெரிய வந்தது.