கவிஞர் வைரமுத்து - திரைப்பாடல்கள் தொகுதி 1,2 - ஓர் ஆய்வு- 19.சட்டம், சிங்கை டாக்டர் மா.தியாகராசன்

சிங்கை டாக்டர் மா.தியாகராசன்
drthyagarajan2010@gmail.com

19.சட்டம்
நாகரிகமாக வாழ வேண்டிய மக்களுக்குச் சட்டம் என்பதே ஒரு சிறந்த பாதுகாப்பாக அமைய முடியும். அந்தப் பாதுகாப்பு, அச்சட்டத்தைக் கொண்டு செலுத்தும் அலுவலர்களின் நேர்மையில் தான் புத்துயிர் பெற முடியும். நீதியை நிலை நாட்டும் சட்டங்களின் நிலை என்ன என்பதையும் கவிஞர் அச்சமின்றிப் பாடியுள்ளார். அது சமுதாய நோக்கமாயிற்றே.
ஆனால் சட்டம் இங்கே ஏற்கனவே ஊமையாகிப் போன ஒருவனின் கையையும் கட்டிவிட்டால் அவனுக்குக் கொடுமை வேறென்ன?
சட்டம் வந்து ஊமைக் கையைக்
கட்டி விட்டது; கண்ணீர் சுட்டுவிட்டது. (1 - 8)
இந்த நாட்டில் நநீதி வழங்கும் நீதிபதிகளெல்லாம் சுட்டப்பட்ட நிலையில் தான் வாழ்கிறார்கள். அவர்கள் கையிலே விலங்க போடாத குறை ஒன்று தான் மீதம்.
நீதி தேவன் கையில் விலங்கு. (1 - 97)
கரும்பு தின்னக் கூலி கேட்பது போல தாலி கட்டவும் கூலி கேட்கிறார்கள். வரதட்சணைப் பேய் அந்த அளவு சூழ்ந்து கிடக்கிறது. ஆனால் சட்டத்தைச் செலுத்துவோர்க்கு இது தெரியாதா? தெரியும். அவர்கள் அடிமைப் போல வாழும் நிலையில் என்ன செய்ய முடியும்?
தாலி கட்டவும் கூலி கேட்பது
தர்மமான திங்கே
சட்டம் அதையும் பார்த்துக்கொண்டு
சலாம் போடுதிங்கே. (1 - 150)
சட்ட மீறல்கள் எல்லாம் இங்கே சட்டமாகி விட்டது போலும்.
இந்த நாட்டில் குற்றவாளிகள் தாம் சுதந்திரமான வாழ்க்கை வாழ்கிறார்கள். அவர்கள் கொட்டத்தை அடக்க எந்தச் சட்டமும் ஒத்துவரவில்லை. அது வெறும் ஏட்டில் தானே இருக்கிறது.
குற்றவாளிகளின் கொட்டம் தீர ஒரு
சட்டம் ஒத்துவரவில்லை. (2 - 10)
ஆனால் சட்டத்திற்குக் கட்டுப்பட்டு வாழ வேண்டும் என்ற எண்ணமுடையவர்கள் தங்கள் பெருமையெல்லாம் குன்றிப்பேபாய் வாழ்கிறார்களே.
சட்டம் என்னும் வட்டத்துக்குள்
கட்டுப்பட்டு - சில
யானைகள் பூனைகள் ஆகும். (2 - 76)
ஆனால் சட்டத்தையே தன் வசதிக்காக வளைத்துக் கொண்டு வாழ்பவர்கள் இழிந்தவர்களாயினும் எல்லா வசதிகளோடும் தலை நிமிர்ந்து வாழ்கிறார்கள் என்பதையும் மறுப்பதில்லையே.
சட்டத்தையே சட்டைப் பையில்
வைத்துக்கொண்டு - சில
பூனைகள் யானைகள் ஆகும். (2 - 76)
சட்டம் ஒருவனைக் குற்றவாளி எனக் கூறிவிட்ட நிலையிலும் பொதுமக்களுக்கு அவன் நிரபராதி என்பது தெரிந்திருக்கும். ஆயினும் என்ன? காவலர்களால் அந்த நிரபராதி படும் கொடுமை தொடர்ந்து கொண்டு தானே இருக்கிறது.
சட்டத்தில் சொன்னாங்க அவனோ கொலையாளி.
அவனைத் தேடி
வனத்தில் ஓடி ஓடி
புண்ணாகிப் படுத்துச்சாம் போலிஸ் புலி. (2 - 84)
நாம் சதந்திரம் பெற்றதாகக் கூறுகிறார்கள். இந்தச் சுதந்திரம் யாருக்கு? வசதியும் வாய்ப்பும் படைத்த கொள்ளையர்கள் - கொடியவர்கள் இந்த நாட்டுக்கு வந்த சுதந்திரத்தைக் கேலிக் கூத்தாக்கி விட்டார்களே. பணம் படைத்தவனுக்குச் சட்டம் கைகட்டித் தொண்டு செய்கிறதே.
காசுக்கு விக்கிது சட்டமிங்கே
கை கட்டி நிக்கது தர்மமிங்கே
இன்னும் விடியலையே
இன்னும் விடியலையே. (2 - 117)
ஆம்! ஏழைகளுக்கு இன்னும் விடியவில்லை தான். அவர்கள் வாழ்க்கை எப்போதும் இருண்டு கிடக்கிறதே. இந்தச் சாட்டுச் சுதந்திரம் வந்தால் என்ன, வராவிட்டால் என்ன? அவனுக்கத்தான் விடியே இல்லையே. இங்குச் சட்டம் என்பது கயவர்களுக்கு, அரசியல்வாதிகளுக்குப் பாதுகாப்பளிப்பதற்குத் தான் உள்ளது. இந்த நாட்டு மக்களுக்குச் சட்டம், நீதி என்பவற்றின் மீதிருந்த நம்பிக்கை தகர்ந்து போய்விட்டது என்பதைத் தான் கவிஞரின் பாடல்கள் நமக்கு உணர்த்துகின்றன. இனி எப்போது விடியும்? எப்போது விடியும்?