கவிஞர் வைரமுத்து - திரைப்பாடல்கள் தொகுதி 1,2 - ஓர் ஆய்வு - 30. அலர், சிங்கை டாக்டர் மா.தியாகராசன்

சிங்கை டாக்டர் மா.தியாகராசன்
drthyagarajan2010@gmail.com

30. அலர்
அலர் என்பது பல பொருள் ஒரு சொல். எனினும் அகத்திணையில் இச்சொல்லுக்கத் தனிப் பொருள் உண்டு. தலைவனும் தலைவியும் இறையருளால் கூட்டுவிக்கப் பெற்றுக் காதல் மாதத்திற்கு மேல் மிகக் கூடாது என்பதாகப் பொருள் இலக்கணம் கூறும். இலக்கணம் என்பதே ஒழுக்கத்துக்கு உண்டான கட்டுக் கோப்பு -- வேலி தானே. அது மொழியாயினும் இசையாயினும் வாழ்வாயினும் எல்லாவற்றுக்கும் பொருந்துவது தான்.
எனவே, இரண்டு மாதத்திற்கு மேற்பட்டு நடைபெறும் களவொழுக்கம் பெண்ணின் உடலில் தோன்றும் மாற்றங்களால் பிறரால் அறியப்படும். அந்நிலையில் மற்றவர்களால் வெளிப்படையாகப் பேசப்படும் சூழ்நிலையும் தோன்றிவிடும். இத்தகைய நிலை தான் ‘அலர்’ என்று அகப்பொருளில் குறிக்கப்படும்.
இந்தச் செய்தியைத் தான் நம் கவிஞரும் தம் பாடல்களில் வெளிப்படுத்துவார்.
காக்கைகள் மட்டுமே காதலைத் தீர்மானிக்கும் வரை காதலர்கள் துன்பப்படத் தானே வேண்டியிருக்கும். காதலன் இன்னும் அவளைப் பலரறியக் கைப்பிடிக்கவில்லை. உலைவாயை மூடலாம்; ஊர் வாயை மூட முடியுமா? ஊருக்குள்ளே பேச்சு எழுந்துவிட்டது என்பதை அவள் எடுத்துச் சொல்கிறாள். மலரின் மீது முள் பட்டாலும் முள் மீது மலர் பட்டாலும் பாதிக்கப்படுவது மலர் தானே. அப்படித்தான், எங்குமே பெண்ணே துன்பத்தில் துடிப்பாள்.
உன்னை எண்ணி மூச்சிருக்குது -- உள்ளுரில்
என்னென்னவோ பேச்சிருக்குது. 1 - 193)
காதல் வந்துவிட்டால் மாமன் பேச்சைக் கேட்டாலும் வேப்பங்குச்சி கூட இனிப்பாக இருக்கும். ஆனால் வெறும் வாயை மெல்லுகின்ற ஊருக்கு அவல் கிடைத்தவிட்டால், பின் கேட்க வேண்டுமா? ஊருக்குள்ளே பேச்சு எழுந்து விட்டது. அலர் தோன்றிவிட்டது. இதையெல்லாம் மாமனுக்கு எடுத்துச் சொல்லத் தூதனுப்பலாம் என்றாரோ, பொருத்தமாக யாரும் சிடைக்கவில்லையே. அவளுக்கு இன்பத்தில் துன்பம் பிறக்கிறது.
ஊரெல்லாம் நம்மைப்பத்தி வெறும் வாய்மெல்ல
தோதாக யாருமில்லை தூதுசொல்ல. (2 - 149)
அவனும் அவளும் காதலிக்கத் தொடங்கினார்கள். அவள் நினைவு நெஞ்சிலும் கையிலும் தித்திக்கின்றது. ஆனாலும் ஊருக்கும் தித்திக்கிறது. அவர்கள் அவர்களைப் பற்றிப் பேசி மகிழ்கிறார்கள். இதை உணர்ந்த அவன் அவளிடத்தில் நிலையை எடுத்துச் சொல்கிறான்.
வண்ணத்திப் பூச்சி
வயசென்ன ஆச்சி
உள்ளூரு முழுக்க
ஒன்னப் பத்திப் பேச்சு!
என்னமோ இருக்கு
எனக்கும் சிறுக்கு. (2 - 170)
ஊரின் நிலையை அவனே எடுத்துச் சொன்னாலும் அதனால் பாதிக்கப்படுபவள் பெண் தானே. இது பெண்ணினத்திற்கே உண்டான சாபக்கேடு போலும்.
சினிமாப் பாடலாயினும் அகப் போருள் செய்திகளை ஆங்காங்கே எடுத்தாள்வது கவிஞரின் திறமை என்பதற்கு இது ஒரு எடுத்துக்காட்டு ஆகும்.