மிஸ்டு கால் பெண்ணுக்காக காதலர் தினத்தில் பணத்தை இழந்த வாலிபர்!!

ஆம்பூர் பஸ் நிலையத்தில் வேலை செய்பவர் அரவிந்த்சாமி (25, பெயர் மாற்றப்பட்டுள்ளது). கடந்த சில நாட்களாக இவரது செல்போனுக்கு ஒரே எண்ணில் இருந்து தொடர்ந்து மிஸ்டு கால்கள் வந்தன.

இதையடுத்து அந்த எண்ணை தொடர்பு கொண்டு அரவிந்த்சாமி பேசினார். எதிர்முனையில் கனிவான குரலில் பேசிய பெண், ‘நீங்கள் எங்கிருந்து பேசுகிறீர்கள்?’ எனக்கேட்டுள்ளார்.

ஆம்பூரில் இருந்து பேசுகிறேன் என்று அரவிந்சாமி கூறியுள்ளார். அதற்கு அந்த பெண், ‘நான் கும்பகோணத்தில் இருந்து பேசுகிறேன்.

சில நாட்களுக்கு முன்பு நான் ஆம்பூருக்கு வந்தேன். அப்போது பஸ் நிலையத்தில் உங்களை பார்த்தேன். நீங்கள் ரொம்ப அழகாக இருக்கிறீர்கள்.

உங்களை பார்த்தவுடன் எனக்கு பிடித்துவிட்டது. திருமணம் செய்தால் உங்களைத்தான் திருமணம் செய்வேன்’’ என்று காதல் ரசத்தை காதில் கொட்டியிருக்கிறார். மேலும் காதலர் தினத்தன்று உங்களிடம் பேசுவேன் என்று கூறி கட் செய்துள்ளார்.

இதனால் காதல் கனவில் மிதக்க தொடங்கினார் அரவிந்த்சாமி. பின்னர் 'காதலர் தினம் அன்று பெரும் எதிர்பார்ப்புடன் போன் செய்துள்ளார். போனில் பேசிய அந்தப்பெண், எனது செல்போனில் பேலன்ஸ் இல்லை, நான் வெளியே இருக்கிறேன். எனவே எனது எண்ணிற்கு ரீசார்ஜ் செய்யுங்கள். ப்ளீஸ்' என்று கூறிவிட்டு கட் செய்துள்ளார்.

அந்த நம்பருக்கு அரவிந்சாமி ரூ.500 ரீசார்ஜ் செய்துவிட்டு பின்னர் தொடர்பு கொண்டபோது சுவிட்ச் ஆப்...... என வந்தது. அதன்பிறகு எத்தனை முறை போன் செய்தாலும் சுவிட்ச் ஆப் தான்.... காதலர் தினத்தில் 500 ரூபாயை இழந்த அரவிந்த்சாமி, இதுபற்றி தனது நண்பர்களிடம் புலம்பி வருகிறார்.