நூல்: யாரிவன்-திறனாய்வு (கவிதை நூல்)திறனாய்வாளர் :முனைவர் ச.சந்திரா

by **eraeravi** Sat Aug 07, 2010 11:13 pm

ஆசிரியர்:கவிஞர் இராம் மோகன்

நுழைவாயில்:
தேசம் எனும் வட்டத்திற்குள் சுழன்று வரும் 'யாரிவன்?' - எனும் கவிதை நூல்,
'இந்தக் கவிஞர் யார்?' என்பதனை இலக்கிய உலகிற்கு அறிமுகப்படுத்தும் ஓர்
அற்புத நூல். நீள்கவிதை, குறுங்கவிதை, புதுக்குறள், வழக்காடு மன்றம் என
சற்றே வித்தியாசமான கலவையுடன், அவ்வப்போது அந்நிய மொழியாம் ஆங்கிலமொழியின்
தலை காட்டுதலுடன் புத்தகங்களின் பக்கங்கள் நகர்கின்றன.

நரம்போட்டம்:

நிலமகளும் வானமகளும் கை கோர்க்கின்றனர் இந்நூலின் பல பக்கங்களில்,
தேசத்தைப் பற்றிய கவிஞரின் உள்மனத் தகிப்பு கவிதை நூலில் தீக்கங்குகளாய்க்
கொட்டுகின்றன. ஆம்! 'சமூகம்' குறித்த அவரது மனக்குமுறல்கள்
கதிர்வீச்சுக்களாய்ப் பாய்கின்றன பக்கம் பக்கமாய். கவிஞரின் கரங்களில்
கடவுள் பந்தாடப்படுகின்றார்! சில நேரங்களில் பக்கவாத்தியமும்
வாசிக்கின்றார் 'சாபக்கேடுகள்' - கவிதை நகைச்சுவை உணர்வுடன் சொல்லப்பட்ட
'நச்'- என்ற கவிதை. தகவல் களஞ்சியத்தை மிஞ்சுகின்றது கவிஞர் இராம் மோகனின்
'அகவல் களஞ்சியம்' எனும் தலைப்பில் அமைந்த கவிதை. "வாய்பேசுகிறது" -
கவிதையைப் படித்த எவரும் திருந்தாமற் போவதற்கு வாய்ப்பே இல்லையெனலாம்.
"ஒளிப்பரிமாற்றமா? சில்லறை பரிமாற்றமா?" திகைக்க வைக்கிறது "வானம்"- எனும்
கவிதை. "இருந்தென்ன" - எனும் தலைப்பிலான கவிதை குறைகளையும், கறைகளையும்
பட்டியலிட்டாலும், மனதிற்கு நிறைவான கவிதை. ~இருப்போரும் இல்லாதவரும்"
கவிதையோ இத்தொகுப்பில் ஈடு இணையற்ற கவிதை. குறியீட்டு உத்தியில்
"தூக்குமரங்கள்" - எனும் கவிதையும் படிம உத்தியில் "உறவும் பிரிவும்" -
கவிதையும் அழகுற வடிவமைக்கப்பட்டுள்ளது.

இதயப்பகுதி:
வயலைப் பொற்கொல்லனாக எண்ணி ஒப்பிட்டுப் பார்க்கும் கவிஞனின் பார்வை
பாராட்டத்தக்கது. பாரதி பக்கத்திற்குப் பக்கம் உலா வந்து இந்த நூலுக்கு
உயிரோட்டம் அளிக்கின்றார். ஜல்லிக்கட்டும் பெண்களின் புகுந்த வீட்டு
இக்கட்டும் கவிஞரால் கவினுறப் பொருத்திக் காட்டப்பட்டுள்ளது. எய்ட்ஸ்
நோய்க்கு மலர்வளையம் வைக்கக்கோரும் கவிதை உண்மையிலேயே ஓர் உருப்படியான
கவிதை. வறுமையை கூட அழகியல் உணர்வோடு சொல்லிச் செல்லும் கவிஞரின்
சாமர்த்தியம் இதோ!

"ஒழுகும் மழைநீரை வரவேற்க
என் வீட்டில் நடக்கும்
பானை அணிவகுப்பைப்
பார்க்க வர்றேளா?" (ப.30)

ஆச்சர்யமும் வினாக்களுமாக கவிஞரின் கவிதைகள் அனைத்தும் முடிக்க
மனதில்லாமல் முடிக்கப்பட்டிருக்கின்றன இந்நூலில். காலத்திற்கும்
இடத்திற்கும் தகுந்தாற்போல ஆங்காங்கே கவிதையைச் சமர்ப்பணம் செய்திருக்கும்
விதத்தில் அவரின் சமூக அக்கறை, நன்றியுணர்வு புலப்படுகின்றது.

உதாரணத்திற்கு ஓரிரண்டு

நிறுத்தற் குறியீடுகள் பயணம் விடாமல் தொடர்கின்றன ஆதி முதல் அந்தம் வரை.
சிற்சில இடங்களில் நாட்டுப்புறப் பாடலின் வடிவம் பளிச்சிடுகின்றது.
கவிதையின் தலைப்புகள் சில, கவிநயத்தில் கவிதைகளையும் மிஞ்சுவனவாக உள்ளன. 'வெள்ளிரதம்', 'அட்டில் புகை', 'நகுக', 'பொழியாக் கருமுகில்'
என்பன உதாரணத்திற்கு இங்கே சொல்லப்பட்டத் தலைப்புக்கள். இட்டார் பெரியோர்
இடாதார் இழிகுலத்தார்'- என முன்னோர் சாதி குறித்துச் சொல்லிச் செல்ல,
கவிஞரோ

சம்பளம் வாங்குவோர் ஒரு சாதி
மற்றையோர் மறு சாதி"

என சமூகம் இரு சாதிகளை உள்ளடக்கியது என்கிறார்.

சமூகத்தைப் படம் பிடித்துக் காட்டும் வரிகள் இதோ!

"நாற்றங்காலை கருக விட்டு
அறுப்புக்கு ஆள் அனுப்புகின்றோம்" (ப.38)

முற்றிலும் முரணான குறுங்கவிதை :

"கரிசல் காட்டில்
உலா வந்த
வெள்ளைப் புறா "(ப.11)

மனதில் பதிந்த கல்வெட்டுக் கவிதை :

"யாருக்கும் தெரியாமல்
புக்ககம் போனவள்
வான வேடிக்கை
மேள தாள
நாதஸ்வரக் கச்சேரியுடன்
பிறந்தகம் வருகின்றாள்" (ப.39)

எனும் கவிதையில் மழையும் மங்கையும் வாழ்வியல் முரண் நயத்துடன் ஒப்பிட்டுச் சொல்லப்பட்டிருக்கிறது.

மனமார....
சமூக அக்கறையுடனும், பொறுப்புடனும் கவிஞர் இராம்மோகன் படைத்த 'யாரிவன்?' -
கவிதை நூலை வாசிப்போர் திருந்தியாகணும்! வாசிக்காதாரோ கண்டிப்பாய்
வருந்தியாகணும்! ரூ.40 விலையுள்ள இந்த நயமான நூலை இலக்கிய ஆர்வலர்
அனைவரும் வாங்கிப் படித்து பலன் பெறுங்கள்! அடுத்தடுத்து நூல்கள்;
அடுக்கடுக்காய் வெளியிட்டு நூலாசிரியர் இலக்கிய வானில் உலா வர மனமார்ந்த
வாழ்த்துக்கள்!. நூல்: யாரிவன்-திறனாய்வு (கவிதை நூல்)திறனாய்வாளர் :முனைவர் ச.சந்திரா Icon_bounce

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

நூல்: யாரிவன்-திறனாய்வு (கவிதை நூல்)திறனாய்வாளர் :முனைவர் ச.சந்திரா

நூல்: யாரிவன்-திறனாய்வு (கவிதை நூல்)திறனாய்வாளர் :முனைவர் ச.சந்திரா