அன்புத் தோழர் தோழியருக்கு

ரௌத்திரனின் வணக்கங்கள்!

புதுக்கவிதையின் தாக்கத்தாலும் வீறுமிகு வீச்சாலும் மரபுக் கவிதை தனது மகுடத்தை இழந்துவிட்ட ஒரு கால கட்டத்தில் நாம் இருக்கிறோம் என்றால் அது முற்றிலும் பொய்யல்ல.

மரபுக் கவிதையில் பாட இயலாத அல்லது முழுவதும் வேறுபட்ட சில நுணுக்கமான பார்வையில் பார்க்க முடியாத விஷயங்களைப் பாடுவதர்காகவும் அதன் மூலம் மக்களுக்கான இலக்கியத்தை மென்மேலும் வளர்ப்பதற்காகவும் தான் புதுக்கவிதை என்ற ஒரு வடிவத்துக்காகவே நமது முன்னோடிக் கவிஞர் பெருமக்கள் போராடினார்கள் என்பது என்னவோ ஒத்துக்கொள்ள வேண்டிய ஒன்றுதான்.

ஆனால், புதுக்கவிதைக்கு பெறப்பட்ட அங்கீகாரமானது நமது தமிழ் இலக்கிய வரலாற்றில் எவரும் பார்த்திராத பல புதிய சாதனைகளுக்கு எப்படி அடிப்படையாக அமைந்ததோ அதே போல, அதே அளவு, இலக்கியம் என்பது நீர்த்துப் போவதற்கும், எவர் வேண்டுமானாலும் எழுதுகோலை எடுத்துக் கொண்டு நானும் கவிஞன் என்று மார்தட்டிக் கொள்வதற்கும், மரபு என்ற மகத்தான இலக்கிய வடிவம் நாளடைவில் நசிந்து காணாமல் போவதற்கும் அடிப்படையாக அமைந்துவிட்டது என்பதும் மனசாட்சியோடு நாம் தலைகுனிந்து ஏற்றுக்கொண்டே ஆக வேண்டிய நிதர்சனம் ஆகும்.

புதுக் கவிதையின் வருகையால் இலக்கியம் மொழி அறிவு அதிகம் அற்ற சராசரி மனிதர்களாலும் கூடப் புரிந்துகொள்ளக் கூடிய அளவுக்கு எளிமையானதும், பாமரருக்கும் நெருக்கமான ஒன்றாகவும் ஆகிவிட்டது என்பது எந்த அளவுக்கு மகிழ்ச்சிகரமான விஷயமோ அதே அளவுக்கு மரபின் வீழ்ச்சியால் மக்கள் தமது தாய் மொழி குறித்த ஆழ்ந்த அறிவை வளர்த்துக் கொள்வதற்கான தேவையையே இல்லாமல் செய்துவிட்டது என்பது மிகப் பெரியத் துயரமும் ஆகும்.

புரட்சியை பாடுவதற்கு புதுக்கவிதைதான் ஏற்ற வடிவம் என்றால் அது முற்றிலும் உண்மை என்றோ சரியான கருத்து என்றோ ஏற்க முடியாது. அப்படிப் பார்த்தால், பாரதியும் பாரதி தாசனும் கண்ணதாசனும் பாடியதெல்லாம் புரட்சி இல்லையா?

எனவே எக்காலத்திலும் அந்தந்தக் காலத்தில் வாழ்ந்துகொண்டிருக்கும் மக்களின் துயரங்களை அவர்களின் துயரங்களைத் துடைத்தெறியத் தேவையான புரட்சியையும் அழகும் அக்கினியின் உஷ்ணமும் குறையாமல் மரபால் பாட இயலும் என்பதை மெய்ப்பிக்க நான் நிறைய மரபுக் கவிதைகளை இதுமட்டும் இயற்றிக் காட்டியிருக்கிறேன். மேலும்,

மரபுத் தமிழே காணாமல் போய்க்கொண்டிருக்கும் இக்கால கட்டத்தில் மரபை மீண்டும் மீட்டெடுப்பதோடு மரபில் நம் முன்னோர் பாடி வந்தது போல பல காவியங்களையும் இயற்ற வேண்டும் என்பதும் எனது லட்சியங்களுள் ஒன்றாகும்.

அந்த வகையில் நான் முதன் முதலில் எழுதிய காவியமொன்றை இந்தத் தளத்தில் வெளியிட முடிவு செய்திருக்கிறேன்.

இது எனது கன்னி முயற்சி. எனவே குற்றம் குறைகளும் இருக்கலாம். அவரவர் பார்வையில் குற்றம் என்று படுகின்றனவற்றை விமர்சனமும் செய்யலாம்.

தோழர் தோழியர் நல்ல தமிழுக்கு வரவேற்பு அளிப்பீர் என்ற நம்பிக்கையோடு....


-------------ரௌத்திரன்

மகிழ்ச்சி தொடருங்கள்... தங்களின் கண்ணதாசன் துதி என்ற நூலை வாங்கிவிட்டேன். மற்றொரு நூல் கிடைக்கவில்லை. எனக்கு அனுப்பி வைக்கவும். நன்றி.

யாப்பை சரி பார்க்க மென்பொருள்கள் இணையத்தில் இருக்கிறது. பயன்படுத்திக் கொள்ளவும்.