ரௌத்திரனின் "குற்ற நெஞ்சம்-காவியம்" (பகுதி-3)

by ரௌத்திரன் Sat Mar 16, 2013 3:08 am

பெற்றவர்கள் யாரென்று அறியா நங்கை
-------புத்தியது தெரிந்திட்ட நாளி ருந்து
முற்றுமவள் வளர்ந்ததெலாம் அநாதை இல்லம்!
-------முறையுடனே தான்வளர்ந்தாள் முறைகே டில்லை!
பற்றுகளில் சிறியதான பற்றை யெல்லாம்
-------பற்றிதினம் வளர்ந்திட்ட மழலைப் பெண்ணாள்
பற்றுக்கும் பற்றையூட்டும் பருவ மெய்தி
-------பற்றிமிக எரியவிட்டாள் ஆண்கள் நெஞ்சை!

(வேறு)

கடைவிழிப் பார்வை காட்டுவாள்; நெஞ்சைக்
--------குகையினைப் போலவே குடையும்!
"இடைவெளி கொஞ்சம் இடைவிடு பிழைக்க"
--------என்னுமா றிதயமே உடையும்!
இடைவெளி கொஞ்சம் இடைவிடும் போதும்
-------"இத்தனை வஞ்சமேன்?" என்னும்!
நடைவழி வந்தே படைகொளும் வீரன்
--------போலவள் மயக்கமே தின்னும்!

"எத்தனை அழகு! எத்தனை அழகு!"
--------என்றொரு இதயமே கொஞ்சும்!
"இத்தனைக் கடிதா மனதினை அடக்கல்?"
---------என்றொரு இதயமே துஞ்சும்!
"அத்தனை எளிதா என்மனம் அசைத்தல்?"
---------என்றிடும் ஞானியர் நெஞ்சும்
""மத்"தனை நெஞ்சை நித்தமும் கடைந்தாய்
---------"மத்த"னைக் கா!"வெனக் கெஞ்சும்!

கைவளைச் சற்றும் குலுங்கிட முற்றும்
---------காளையர் வாலிபம் குலுங்கும்!
மைவளைத் துள்ள மைவிழித் துள்ள
---------மாற்றிலை அதற்கொரு விலங்கும்!
ஐவளைத் துள்ளும் ஐம்புல னெலிகள்
---------ஆடுமோர் பாம்பென இலங்கும்!
நைபவர் பூசை செய்பவர் கண்டு
---------நல்லவள் நெஞ்சமும் கலங்கும்!

மென்னிடை நோக்கித் தன்னெடை நோக்கப்
---------பின்னிடை இறங்கும் குழல்தான்!
பின்னிடை மேடை தன்னிடை இரண்டு
---------மத்தளம் கொட்டிடும் எழில்தான்!
விண்ணிடை மின்னல் பொன்னிடை கண்டால்
---------"உன்னிடை ஒளிவிடும் நிழல்நான்"!
என்றிடு மென்னில் ஏங்குவார் நெஞ்சில்
----------தூங்குமோ காதலின் அழல்தான்?

காணுவார் நெஞ்சம் பூணுமோர் நகையப்
---------பூவையின் பூமுக மாகும்!
நாணுவார் ஆண்கள் மட்டுமே யல்ல
---------நாயகி தோழிகள் தாமும்!
காணுமா றுரைக்கும் காரிகை தோழி
---------மாருடன் ஏகுவள் மாலை!
வேணுமோர் கேலி வார்த்தைகள் ஆடி
---------கல்லூரி விட்டதோர் வேளை!

(வேறு)

கல்லூரி வளாகந் தன்னில்
-------காட்சிய ளித்தி ருந்த
தெள்ளிய பலகை யொன்று
-------தெரிவிக்கும் "நாளை மாலை
கல்லூரி இருபத் தைந்து
-------ஆண்டுகள் நிறைவை யொட்டி
நல்லதோர் விழவு" என்று
-------நறுங்கொடி தானுங் காண்பாள்!

----(காவியம் தொடரும்)

------ரௌத்திரன்