ரௌத்திரனின் "குற்ற நெஞ்சம்-காவியம்" (பகுதி-1)

by ரௌத்திரன் Fri Mar 01, 2013 11:22 pm

குற்ற நெஞ்சம்-காவியம்

ஸ்ரீ ஐயப்பன் காப்பு!

அந்தமே இல்லா நாதன்
-----ஆதியும் அற்ற வேதன்
சந்ததம் துதிப்ப வர்க்கும்
-----சிறுமதி யாலே நாளும்
நிந்தனை செய்ப வர்க்கும்
------நிழல்தரும் கருணைத் தெய்வம்
பந்தள ராஜ பாலன்
------பதமெனைக் காப்ப தாக!

வாணி வாழ்த்து!

மடியிடை வீணை வைத்த
-------மங்கலத் தேவி! உன்றன்
துடியிடை போலே யென்னைத்
-------தேயவே விடுத்தா யேனும்
நெடிதுயர் கொங்கை யொத்த
-------நற்றமிழ் வனப்பு தந்தாய்!
அடியிணைத் தொழுது நின்றேன்
-------அன்னையே காப்பா யாக!

அவையடக்கம்!

முற்றிய அறிவு மில்லான்
-------முறையுடன் தமிழுங் கல்லான்!
நற்றமிழ் ஆளு கின்ற
-------நற்கலைத் தேர்ச்சி யில்லான்!
பற்றிய ஆசை யன்றி
-------பெருந்திறன் ஏது மில்லான்!
வெற்றெனக் கவிதொ டுக்கும்
-------வசையினைப் பொறுப்பீ ராக!

நெற்றிக்கண் திறந்து நின்ற
-------நீள்சடை ஈசன் முன்பும்
குற்றமென் றெதிர்த்து நின்ற
-------கனித்தமிழ்க் கவிஞர் நாட்டில்
பற்றுக்கண் திறந்து நெஞ்சைப்
-------படுத்திய பாட்டி னாலே
சற்றுப்பண் பாட வந்தேன்
-------சிறுமைகள் பொறுப்பீ ராக!

பிழைகளே மலிந்த போதும்
-------பொருள்கூடப் புரியா போதும்
குழவியின் நாவைத் தாய்தான்
-------நறுக்கிட மாட்டாள்; மாறாய்த்
தழுவியே கொஞ்சி வைப்பாள்!
-------தமிழர்தம் நெஞ்சும் கூட
வழுவினைப் பொறுக்கும் தாய்போல்
-------என்றுபா டத்து ணிந்தேன்!

(காவியம்-தொடரும்)--ரௌத்திரன்