ரௌத்திரனின் "குற்ற நெஞ்சம்-காவியம்" (பகுதி-4)

by ரௌத்திரன் Sat Mar 16, 2013 3:14 am

மேடையை அமைத்த மேன்மையைக் கண்டு
---------மனமிக மகிழ்ச்சிதான் கொள்ளும்!
வாடையைக் கொட்டி வார்த்திடு மலர்தம்
---------தோரணங் கள்கருத் தள்ளும்!
ஆடையை இழந்த ஆரணங் குகைபோல்
---------அவசரங் கள்மிகத் துள்ளும்!
கோடையில் உதிர்ந்து கிடந்திடு மிலைகள்
---------கோலமே ஜனத்திரள் சொல்லும்!

(வேறு)

ஆயிரம் பேர்க்கும் மேலே
---------அமைவுடன் அமர்ந்தி ருந்தார்!
தூயதோர் மணம்ந டக்கும்
---------வீடென இரைச்சல் செய்தார்!
பாயிரம் போல அந்தக்
---------கல்லூரி முதல்வர் பேசத்
தேய்ந்திடும் சப்தம்; ஆழி
---------ஆறாகச் சிறுத்த தன்ன!

"கல்லூரி விழவி னுக்கு
---------கனிவுடன் வருகை தாரும்
நல்லதோர் பத்தி ரிக்கை
---------நடத்திடுந் தலைவ ருக்கு
எல்லோரும் எழுந்து நின்று
---------மதிப்பினை அளிப்பீர்!" என்றார்
வில்லினிற் கிளம்பும் அம்பாய்
---------விரைந்தவர் எழுந்தார் நின்றார்!

பின்னந்தப் பிரமு கர்க்கு
---------பெரியதோர் மாலை போட
நன்மாணாக் கர்கள் தாமுங்
---------கைகளைத் தட்டி னார்கள்!
முன்னுரை போலப் பேசி
---------முடித்திட்டார் முதல்வர்; ஆங்கே
கிண்ணென்று எழுந்து நின்றார்
---------பிரமுகர் பேசு தற்கு!

வீரத்தைப் பற்றிப் பேச
---------வந்தவன் போல அன்றி
வீரமே எழுந்து வந்து
---------பேசிடும் பாவ னையில்
நேரமே வீணா காது
---------நெஞ்சத்தில் உள்ள வற்றின்
சாரமே பிழிந்து வைத்துச்
---------சபையினை மகிழச் செய்தான்!

எழுத்தாளன் என்ப தற்கு
---------எழிலான எடுத்துக் காட்டாய்ப்
பழுத்தவன்; கல்வி மிக்கப்
---------படித்தவன்; சமுதா யத்தைக்
கழுத்தென பாவிக் கின்ற
---------கருத்தினன்; கொள்கைக் கோட்டில்
நிலைத்தவன்; புதுமை நெஞ்சில்
---------நிறைத்தவன்; புரட்சிக் காரன்!

இயற்கையின் அழகில் தன்னை
---------இழப்பவன்; மாதர் நெஞ்சை
மயற்கையில் ஆழ்த்தச் செய்யும்
----------மன்மதன்; கொடுமை கண்டால்
புயங்களை உயர்த்து கின்ற
----------ஆண்மகன்; இன்ன வாறாய்
இயங்கிடும் அவன்பேர் "பால
-----------சூரியன்" பிரம்மச் சாரி!

(காவியம்-தொடரும்)

------ரௌத்திரன்

by **கவியருவி ம. ரமேஷ்** Sat Mar 16, 2013 8:30 am

இயற்கையின் அழகில் தன்னை
---------இழப்பவன்; மாதர் நெஞ்சை
மயற்கையில் ஆழ்த்தச் செய்யும்
----------மன்மதன்; கொடுமை கண்டால்
புயங்களை உயர்த்து கின்ற
----------ஆண்மகன்;
மிக்க மகிழ்ச்சி

by ரௌத்திரன் Sat Mar 16, 2013 2:54 pm

நன்றி நண்பரே!-----------ரௌத்திரன்

by Sponsored content

வித்யாசாகரின் எழுத்து பயணம்

தமிழ் அறிஞர்களின் மின்நூல்கள் - யாழ்பாவாணன்

ரௌத்திரனின் "குற்ற நெஞ்சம்-காவியம்" (பகுதி-4)

ரௌத்திரனின் "குற்ற நெஞ்சம்-காவியம்" (பகுதி-4)

Re: ரௌத்திரனின் "குற்ற நெஞ்சம்-காவியம்" (பகுதி-4)

Re: ரௌத்திரனின் "குற்ற நெஞ்சம்-காவியம்" (பகுதி-4)

Re: ரௌத்திரனின் "குற்ற நெஞ்சம்-காவியம்" (பகுதி-4)